入堡

入堡（英文：castling，又叫王車易位）係國際象棋入面嘅一種特別嘅郁法。佢係唯一一步可以一次行兩隻棋嘅行法，亦都係除咗騎士之外，唯一一步一隻棋可以跳過另一隻棋。行法係將王向一車嘅方向平移兩步，再將車越過王，停喺王隔籬嗰一格，可以細分為王翼入堡（又叫短入堡）同后翼入堡（又叫長入堡）。呢個落法喺國際象棋記譜法入面用O-O（王翼入堡）或者O-O-O（后翼入堡）表示。

短易位	長易位

規則

王車易位嘅簡單例子：上面同下面分別顯示長、短易位

王車易位需要滿足呢啲條件：

1. 國王同埋要易位嘅嗰隻城堡都未郁過。
2. 國王同埋要易位嘅嗰隻城堡之間冇其他棋阻住。
3. 國王所在、經過同埋去到嘅格仔都冇畀人攻擊（即係易位嗰陣同埋易位之後唔可以畀人將軍，亦都唔可以穿過畀對方控制住嘅格仔）。
4. 國王同埋要易位嘅嗰隻城堡一定要喺同一橫行（即係唔可以同王前兵升變而出現嘅城堡易位）。

一個常見誤解係王車易位嘅規則比上面更加嚴格，事實上：

1. 即使王之前曾經畀人將軍，但係只要易位嗰陣冇畀人將軍，都可以照嘅。
2. 就算城堡畀人攻擊，都唔會冇得易位。
3. 城堡可以穿越被攻擊嘅格（只適用於長易位）。