香港珠海學院

香港珠海學院（英文：Hong Kong Chu Hai College）係香港一間認可專上學院，而家校址喺新界屯門區青山灣掃管笏。學校前身係1947年喺廣州創辦嘅私立珠海大學，1949年遷校到香港改名珠海書院，2004年做咗認可專上學院再改叫珠海學院，2016年曾經申請升格私立大學，但因收生人數未達標而失敗，此後由於院校競爭激烈，佢嘅收生人數一路下跌，短期內無望升格。

珠海學院校名嘅「珠海」喺1947年創校已經用，同1953年先至建制嘅珠海縣（而家嘅珠海市）並無任何關係，但為免外間混淆，校方好多時都會用香港珠海學院呢個名。

喺2022年11月，珠海學院校董會正式通過將中文校名改做「香港珠海學院」，而英文校名亦都由「Chu Hai College of Higher Education」改做「Hong Kong Chu Hai College」，行政長官會同行政會議亦都喺2022年12月20號批准^[1]。