跳去內容

理想印刷

出自維基百科,自由嘅百科全書
理想印刷機嘅截面圖:一張紙(紅色)從左邊落到托盤,右邊跟住過來嘅另一張紙黐到印筒上高

理想印刷risograph,簡稱 riso),當做版畫技術嗰陣又叫孔版油印[1],係一種高速嘅全自動絲網印刷技術,屬於孔版印刷[2]:9。呢個技術由日本理想科學工業株式會社(Riso Kagaku Corporation)開發,所以叫理想印刷。1986年,理想科學將第一部理想印刷機推出市場。嗰陣時,理想印刷主要喺學校同政府部門用,滿足到佢哋廉價快速複制嘅需求。慢慢噉,喺專營出版商設計師藝術家同埋插畫家之間,佢越來越發展成為最受歡迎嘅印刷工藝。理想印刷嘅特點係唔使加熱、化工製品就可以將色料帶到紙面上。除咗環保,平價嘅耗材成本亦係佢嘅優勢。

Riso RZ 970 型號

要傳送數據,可以用電腦發送分色處理後嘅灰度PDF文件畀理想印刷機,或者通過機器內置嘅掃描元件讀取圖文。印刷機會用激光爲每一種顏色分別打出一張模板紙,張模板紙會繃實到印筒表面,而印筒表面有非常精細嘅鋼絲網。印筒轉嗰陣會擠壓色料,令色料漏過絲網同模板紙,印到放置喺印筒下方嘅紙上面。呢個過程類似絲網印刷。理想印刷嘅色版有大概20種標準顏色。有傳統色,例如黑色紅色,亦有熒光粉熒光橙。除此之外,仲有白色啞金色等等其他多種顏色可以揀[3]

唔同工業用嘅柯式印刷或者手動嘅絲網印刷,即使係幾十張嘅小印量,若果用理想印刷亦好經濟。理想印刷機每分鐘可以印大概150張紙,所以亦適合大量印刷[3]

由於色料乾燥得慢,唯獨唔可以用銅版紙來印[3]

參考資料

[編輯]
  1. . (香港中文). 喺2022年10月23號搵到.
  2. Seematter, Stéphanie (2014-02-21). "Risographie – die ideale Drucktechnik?" (PDF) (德文). F + F Schule für Kunst und Mediendesign Zürich. 原著 (PDF)喺2016-09-02歸檔. 喺2016-09-01搵到.
  3. 3.0 3.1 3.2 "Risographie". Metapaper (德文). 喺2017-10-11搵到.