甲B五鼠案

出自維基百科,自由嘅百科全書
Jump to navigation Jump to search

甲B五鼠案[註 1]係2001年甲B聯賽(今日嘅中甲聯賽)最後1輪發生嘅假波案。亦係中國足球從1994年開始職業化以嚟,最嚴重嘅假波案。

事件主角[編輯]

甲B五鼠案嘅「五鼠」分別係浙江綠城(今日嘅杭州綠城)、成都五牛[註 2]長春亞泰、江蘇舜天(今日嘅江蘇蘇寧)、綿陽太極(2001年解散)。呢五隊分別喺2001年9月29號同2001年10月16號踢咗4場大比分嘅比賽。

經過[編輯]

2001年嘅甲B聯賽規定係升二降二制度[註 3],其中上海中遠(今日嘅北京人和)已經提早一輪升入甲A聯賽(今日嘅中超聯賽)。凈低個位要喺江蘇舜天、長春亞泰同廣州吉利(今日嘅廣州恆大淘寶)、成都五牛[註 2]三個是但一個升入甲A。

由於嗰時中國嘅足球聯賽未實行最後幾輪同時開波制度,所以喺2001年9月29號挨晚,成都五牛主場對陣綿陽太極嘅比賽踢出咗11-2嘅大比分,創咗中國足壇最大比分紀錄[1][2][3][註 4]。結果好多媒體都嚟採訪,連足協都關注咗呢件事,最後決定2001年甲B最後一輪冚唪唥嘅比賽同時開波[6]

戲劇性上演[編輯]

聯賽最後一輪未開波時,甲A前5積分榜係噉:

排名 參賽隊 淨勝
1 上海中遠 20 12 4 4 44 17 +27 40
2 江蘇舜天 20 11 5 4 27 14 +13 38
3 廣州吉利 20 10 7 3 26 12 +14 37
4 長春亞泰 20 10 6 4 31 15 +16 36
5 成都五牛 20 10 6 4 33 21 +12 36

而成都五牛[註 2]同綿陽太極搞出咗11-2嘅大比分之後,中國足協臨時開會決定甲B最後一輪冚唪唥嘅比賽,統一喺2001年10月6號15:00開波。嗰時嘅最後一輪對陣:

嗰時入甲A最後一個名額要求:

成都五牛

最後一場要作客贏江蘇舜天。重要長春亞泰同廣州吉利輸波或打和。假設長春同成都都贏波,要睇淨勝波同入波。

長春亞泰

最後一場要作客贏浙江綠城,重要廣州吉利、江蘇舜天要輸波;假設長春同成都都贏波,要睇淨勝波同入波;假設長春最後一輪作客贏浙江綠城,江蘇舜天同成都五牛打和,長春亞泰都可以借淨勝波數而殺入甲A。

廣州吉利

最後一輪主場必須要贏武漢紅金龍,重要江蘇舜天輸波或打和。長春亞泰嗰邊唔使睇賽果;假設打和,重要江蘇舜天同成都五牛打和兼長春亞泰要輸波或打和,先至有淨勝波優勢而殺入甲A。

江蘇舜天

最後一輪主場必須要擊敗成都五牛;假設打和,重要廣州吉利、長春亞泰要輸波或打和。

2001年10月6號晏晝3點開波之後,比賽除咗廣州吉利主場輸咗畀武漢紅金龍,上海中遠作客贏咗天津立飛嘅比賽好正常之外,前五嘅另外三個隊踢到一鑊熟。上半場重好地地,江蘇舜天主場重喺上半場44分鐘以1-0領先。但下半場風雲突變:

江蘇舜天 對 成都五牛 浙江綠城 對 長春亞泰
半場完 1-0 0-0
下半場
60分鐘 1-0 0-1
76分鐘 2-0 0-1
78分鐘 2-1 0-1
79分鐘 2-2 0-1
83分鐘 2-2 0-2
繼續比賽 比賽暫停6分鐘[註 7]
92分鐘 2-2 0-3
94分鐘 2-3 0-4
95分鐘 2-3 0-5
96分鐘 2-4 0-5
98分鐘 2-4
(全場完)
0-5
100分鐘 (完場) 0-6
全場完 (完場) 0-6
總比分 2-4 0-6

比賽結束之後,積分榜變成噉:

排名 參賽隊 淨勝
1 上海中遠 21 13 4 4 47 19 +28 43
2 成都五牛 21 11 6 4 44 23 +21 39
3 長春亞泰 21 11 6 4 33 15 +18 39
4 江蘇舜天 21 11 5 5 27 16 +11 38
5 廣州吉利 21 10 7 4 28 15 +13 37

按照聯賽正常嘅升降級制度,上海中遠同成都五牛係殺入2002年嘅中甲聯賽。但座落喺杭州黃龍體育場入面睇波啲波迷好大聲嗌「假波」。

處罰[編輯]

2001年甲B聯賽最後一輪踢完,由於出現咗2-4同0-6嘅疑似假波比分,同倒數第二輪嘅11-2比分影響,足協開始處罰踢假波嗰5隊。先係取消咗2001年9月29號成都五牛同綿陽太極,同2001年10月6號江蘇舜天同成都五牛、浙江綠城同長春亞泰呢三場比賽入面,有苟場踢波嘅中國大陸球員喺2002年嘅註冊資格[8]同成都五牛、綿陽太極、江蘇舜天、浙江綠城同長春亞泰5間球會喺2002、2003年嘅甲A、甲B同乙級聯賽引入中國大陸球員資格[8],重唔畀喺嗰三場比賽入面,有執教過球隊份嘅主教練喺2002年聯賽嘅執教資格[8]。而綿陽太極直接降班到乙級聯賽[8]。後嚟嗰5間球會俾足協要求喺3個月內整頓,重要喺2002年1月15號之前上報整頓結果[6]

後續[編輯]

2002年3月4號,江蘇舜天、浙江綠城同綿陽太極三間足球會因為整頓態度比較好而獲得「減刑」[6][9],凈低嘅長春亞泰同成都五牛重係維持原判。足協亦拉咗執法球證龔建平,並判佢坐監到2012年[10],但龔建平喺2004年夏天死咗。

而甲A、甲B聯賽從2002年開始暫停升降級直到2005賽季結束為止[註 8]

本嚟外界話呢屆甲B結束之後,廣州吉利隊會頂住成都五牛隊而升入2002年甲A,但凈得個銡。隨後吉利集團宣佈話未達到預期宣傳效果而退出贊助[11]

[編輯]

  1. 甲B五鼠案係2001年中國大陸大多數媒體同中國足協官方畀出嘅固有名詞,從未有人將「甲B五鼠案」講成「中甲五鼠案」。
  2. 2.0 2.1 2.2 呢度講嘅「成都五牛」係後嚟嘅成都天誠足球會,2012年底因球會拖糧同陷入債務糾紛而解散。
  3. 升二降二係聯賽頭兩位球隊升級,包尾兩隊降班。
  4. 呢個中國足壇最大嘅比分紀錄,喺2010年7月21號晏晝廣州恆大佛山世紀蓮體育場南京有有(2012年解散)10-0嘅中甲賽事打破[4][5]。但中國足球職業化之後,最多入波嘅聯賽賽事重係呢場波(13粒)。
  5. 呢間球會後嚟改名做廈門吉祥藍獅同廈門藍獅隊,到2008年因冇企業接手而解散。
  6. 呢間球會唔好同廣東華南虎籃球會搞亂,因為佢同籃球會都係唔同歷史淵源。足球會嗰間後嚟喺2001年底賣到山東青島重改名做青島海利豐,但後者喺2010年2月13號嘅假波醜聞俾足協取消咗參賽資格。
  7. 長春亞泰入咗第二波之後,浙江綠城隊啲隊員以為長春亞泰隊入波時搞出手球而要求球證改判入波唔算,但球證啋都唔啋。後嚟綠城老細(宋衛平)衝入球場猛咁鬧球證。之後綠城隊啲隊員聽咗老細指揮而入返更衣室後6分鐘先至出返嚟踢波,結果差啲罷賽[7]
  8. 從2002~2005年嘅中超同中甲升降級規律:2002凈升唔降、2003凈降唔升,2004同2005賽季唔升唔降。

文內[編輯]