番禺明經村爆炸案

2021年廣東番禺爆炸案
地點	中國廣州 番禺區化龍鎮明經村政府駐地入面
座標	23°1′3.508″N 113°28′31.051″E
日期	2021年3月22號
形式	自殺式爆炸
武器	爆炸
死亡數	5
受傷數	5

番禺明經村爆炸案喺2021年3月22號朝早10點幾發生。廣東廣州番禺明經村村委會俾炸，有成10個人死傷。據報話係一名59歲胡姓男子疑因舊村改造工程引起嘅土地糾紛，喺村委會坐埋一齊開會嗰陣，趁機帶住自製炸彈入辦公樓自殺式引爆，令到包括襲擊者在內5人當場死亡、另有5人受傷。

襲擊嘅背景

有喺化龍鎮嘅港人透露，胡原係退伍軍人，因憤恨村官唔作為兼涉嫌貪腐，先至帶住炸彈去搞自殺式襲擊。仲有網傳消息話，事件或涉及明經村同時期展開嘅舊村改造工程。據廣州日報原報話喺2020年8月，明經村舊村改造項目喺交易中心完成咗招商。上海升龍投資集團有限公司係經由村表決做咗改造嘅合作企業，改造涉及成80億人仔預算。

多年嘅官民糾紛

由於土地問題，明經村一路都有多次官民衝突。一早喺2009年，明經村二隊村民梁燦輝、周志新、周八娣就入禀過法院，控告話隊長梁紹安強收咗佢哋嘅責任田仲攞去「公開投標」。場官司一路上訴到廣東省法院，結果係以啲村民喺2013年敗訴而告終。到咗2019年4月，梁燦輝兄弟屋企嘅車棚就俾強拆，梁嘅夫人亦遭到咗啲強拆人員嘅暴力對待。

喺近年來廣州城市建設嘅過程之中，唔少鄉村就面臨住俾政府徵地同舊村改造（簡稱「舊改」）嘅問題。2018年9月化龍鎮政府就明經村嘅舊改自行開始咗招標。到2020年8月8號就由上海升龍集團代表同明經村簽協議，預計投資80億改造個村入邊嘅大概108公頃土地。跟住嘅9月廣州市政府就發出咗文件，聲明「徵收」明經村大概10公頃嘅集體土地並改成國有土地。過程之中，喺2019年5月，就有明經村村民試過貼網文，話村委係未經村民同意就變賣咗好多土地，「有些留用地都偷偷賣了」，仲講到一啲招標項目都係內定嘅，連啲村委會人員名下「都有別墅」。一啲村民仲舉過橫額抗議，但政府都係冇回應過呢啲指控。

事發前後

據報話事發嗰陣係明經村每禮拜一嘅村務例會，當地嘅村委書記、村委副書記、治安隊長等幹部都會出席。化龍鎮副鎮長董保生喺時候透露，襲擊中受傷嘅村支書周鉅倫嘅情況係好牙煙。

襲擊現場喺辦公樓二樓，炸彈嘅威力巨大，爆炸後入去見得到辦公樓嘅樑柱同牆身都冧咗，天花冧埋落嚟，四圍都係瓦礫；唔少人倒地不起，喺牆身、梯級度都見到有血漬。事後係有大批特警、消防同救護奉召到場，警方同日中午定性呢個事件做刑事案件並展開調查。