百利新邨碎屍案
百利新邨碎屍案發生響2011年百利新邨第三座地下一間電單車行地舖到，直到2011年8月8號被揭發[1]。
背景
[編輯]三十八歲姓吳嘅男人響7月30號左右接手間舖，佢搬咗入去之後發現響舖頭閣樓廁所牆邊有一個由石屎整成、一米乘一米左右嘅磚牆，以為佢係去水位，但係就搵唔到去水位，7號晚黑重請埋隔離士多舖老世一起研究都冇結果。8號朝早十點響佢細心追查之下，發現連廁所牆身都有血水滲出，重聞到惡臭，佢立即報警同通知業主。業主同治安警先後到場了解，業主話以前從未見過呢幅石屎牆，治安警叫消防到場鑿開。發現石屎牆有三層大約一呎厚，鑿開之後發現入面有五個黑色垃圾袋，分別裝咗唔同部位嘅殘肢。由於現場傳出惡臭，到場調查嘅警察同挖掘嘅消防員都要戴口罩，連企響封鎖線出面嘅記者都聞到臭味[1]。
後續
[編輯]官方
[編輯]司警檢查之後，話相信五袋殘肢係屬於一具被肢解嘅男性屍體，從屍體腐爛程度，估計死者被埋超過半年。由於屍體支離破碎同嚴重腐爛，重冇咗嗰頭同右手手掌，暫時未能確定身份，不過就懷疑死者係一個響賭場四圍行嘅江湖叔父，正透過DNA技術查核死者身份，追緝電單車行上手租客[1]。
民間
[編輯]有街坊話間電單車行開咗半年，由附近一間電單車行一個叫阿木嘅男人搬來做電單車維修，半個月前阿木突然將維修設備同零件變賣失蹤，吳某響十日前左右先頂手來做，其中一個師傅仔過檔跟吳繼續做嘢，所以間舖一直開門做生意。亦有消息話，阿木好爛賭，爭落賭場一身債，唔排除案件涉及追債[1]。
亦有現場消息話，懷疑被肢解男子係澳門人蔡國明，差唔多五十歲，人稱阿明，已婚。阿明響1998年開始做叠碼仔，響回力同海立方賭場到行，係江湖叔父，佢親大佬都係叠碼仔。消息話阿明半年前突然人間蒸發，屋企人同江湖兄弟追查之下，知到佢失蹤之前話要到黑沙環案發電單車行，啲𡃁之後亦聯絡到嗰日接載阿明嘅的士司機，但對方話：「唔記得車咗佢去邊。」，由佢屋企人報警求助，案件之後交畀博彩罪案調查廳同反黑組跟進，由於冇發現阿明屍體，案件一直停咗響到。直到8號電單車舖發現殘肢之後，調查人員就即刻懷疑死者係阿明，正係透過佢屋企人DNA同殘肢進行核對身份，但係暫時未有結果[1]。