神道

嚴島神社嘅鳥居

神道，係日本民族嘅傳統宗教。公元前3-4世紀喺日本產生，屬於一種天地萬物有靈嘅自然崇拜宗教。

佢以祭祀日本本土嘅天神地祇為主，包含各種土生妖魔鬼怪，以日本皇祖皇宗嘅遺訓為內容，屬於泛靈多神信仰（精靈崇拜），視自然界各種動植物為神祇。

教名

神道呢個名，係嚟自中國《周易》觀卦《彖》傳：「觀天之神道，而四時不忒。聖人以神道設教，而天下服矣。」呢度講嘅，即係指一啲自然界嘅法則，聖人用呢啲法則去設立制度，教人信神，因為神會賞善罰惡。後來神道又廣泛解釋成「神明之道」或者「神靈之道」。

簡史

内文：神道教史

神道教基本上分幾個發展階段，公元前3-4世紀，日本由石器過渡到鐵器時代時，屬於原始神道教。到咗飛鳥、奈良時代，即大約6世紀，佛教由中國傳入日本，由於太受歡迎，令傳統神道教要依附佛教發展，受佛教影響，神道教開始有神舍、神宮，同時又開始有神像。平安時代，即9-13世紀，出咗一樣「本地垂跡」學說，話日本所有神靈都係菩薩化身，根據呢個觀念一路到鎌倉時代，就發展出天台宗山王神道同真言宗兩部神道出嚟，佢哋將日本最大嘅神靈，都當係佛嘅化身。呢套理論去到14-15世紀，受中國儒家同道家文化影響，又發展出伊勢神道同吉田神道。

之後，又受到中國新儒學影響，神道教加入新儒學入面，「理」同「氣」嘅宇宙觀，同時又加入君臣之道，即係忠、孝、禮、義、廉、恥呢啲嘢，例如吉川神道同垂加神道就係咁嚟。

到17-19世紀明治維新時期，有人認為神道唔應該有太多佛教同儒家嘅嘢，開始提倡復古神道，宣稱天皇係繼承天照大神神傳，唔單止統治日本，重應該統治全世界。基於呢種主張，發展出一種沙文主義思想，推行神道國教，強行規定話神道唔係宗教，而係國家宗祀，用行政命令逼所有人信神道，同時參拜神舍作為國民義務。直至1945年日本戰敗之後，先結束神道教嘅國教地位。之後組成民間團體「神社本廳」。