禮儀 (基督教)

禮儀（古希臘文：λειτουργία；意思係 ｢公職｣，特別係指公民為國家做嘅嘢，又或者公務員做嘅嘢），喺基督宗教，係指正式公開崇拜嘅禮拜方式，喺咁嘅理解下所有基督宗派都有禮儀，只係傳統唔同，但係實際上淨係天主教、東正教同聖公會等等先講禮儀，其他嘅新教宗派通常都唔會用 ｢禮儀｣ 呢個字眼；後者亦亦好多時被bei2人叫做 ｢冇禮儀傳統｣（non-liturgical）。

另外，東方教會同西方教會對禮儀嘅理解都有出入；喺東方，禮儀就即係聖祭禮儀，但係喺西方，任何正式嘅公開崇拜都叫禮儀，包括拆細咗都算。例如，天主教嘅彌撒係禮儀，但係佢可以拆兩部分，上半叫聖道禮儀，下半叫聖祭禮儀，即係成個同斬半都係禮儀。

個字嘅希臘原文其實喺新約聖經出現過，但係通常只係解職責或者工作之類，即係原文本來並唔係指禮拜方式；同 ｢禮儀｣ 意思最近磅嘅係喺少數經文譯做嘅 ｢敬禮｣。根據天主教嘅解釋，新約原文所講嘅職責包括哂司祭職（敬拜）、先知職（福音嘅宣佈）同君王職（愛德嘅實踐）三方面，並話禮儀就係基督嘅工程，所以基督徒參與禮儀就係參與上帝嘅工作。