禹跡圖
禹跡圖，又寫禹迹圖，為古中國地圖，刻喺石碑上，現存兩塊，分別喺西安同鎮江。
史[編輯]
金攻大宋，趙構南渡臨安即位。金人策反宋官劉豫，殺守將。金人最初無直接管治漢人，完顏宗翰扶植劉豫，封佢大齊皇帝。
西安嗰塊，刻石上寫阜昌七年四月（南宋紹興六年四月），相當於一一三六年。而阜昌係大齊年號。嗰塊石碑另一面係華夷圖，禹跡圖比華夷圖早六個月上石。縱114公分，橫114公分。
原石喺陝西省鳳翔府，岐山縣縣學之中，以前屬長安。最後塊石搬咗去西安碑林。現時美國國會圖書館有拓本。
而鎮江一塊，南宋紹興十二年（1142年）刻。縱84公分，橫79公分。呢張圖圖名標注「元符三年正月依長安本刊」。元符三年，即一一〇〇年。而依長安本翻刻。
圖[編輯]
兩塊禹跡圖相近，但亦有唔同。
西安嗰塊叫禹跡圖，鎮江嗰塊叫禹迹圖，「迹」係「跡」嘅異體字，兩幅地圖應該係同名。鎮江嗰塊細過西安嗰塊，而且刻繪都粗糙啲。鎮江嗰塊嘅海洋部分刻有精細嘅水波紋，西安嗰塊就係留白。
西安嘅禹跡圖，用咗「計里畫方」嘅方法繪製。圖名標示：「每方折百里」，即係一個方格長寬一百里，打橫有71個格，打直有73個格，總共有5110個方格。地圖標示咗380個行政區，近80條河流，近70個山脈，重有5個標咗名嘅湖泊。而海岸同江河住置，以當時來講，都相當準確。