紅警司

紅警司，全稱係廣州紅色警備司令部，尾歸入紅聯就改叫廣州紅色革命造反聯合指揮部警備司令部，係文革陣廣州度部分運動參與者（紅旗派）自己開搞嘅一個自治組織，照時代術語嘅歸類就係「造反組織」。而嗰時候屬於中國解放軍嘅廣州警司（警備司令部），相對咁就被叫做咗黑警司。紅警司設立嘅原初衷，係要替代廣州市公安局同廣州警司去維持廣州嘅治安，因為有奪取廣州警司嘅軍權嫌疑，後尾就被壓咗落去。

背景

1967年7、8月間，廣東同中國大陸嘅各地，都爆發咗搶槍運動同內戰。喺「八月風暴」入邊，參與咗運動嘅團體對準咗解放軍發動衝擊，透過奪取部隊啲武器而自己組建武裝，係文革入邊嘅一次運動高潮。

組成

紅警司係由嗰時一個叫紅旗造反派嘅團體所主導設立，理論上係要擔負起陷於癱瘓嘅廣州社會治安、保衛、交通等職能。司令由公安紅旗派嘅頭領、原八處幹部劉沛良揸旗。副司令就由廣鐵嘅溫仲其、體院嘅吳之偉、「八.三一」黃意堅等擔任。而政委係中南局幹部車學藻、空軍學毛著標兵黃祖示先後擔任，仲有遠洋公司嘅黨委書記田明都做過一輪。武傳斌試過喺北京邀請埋黃永勝擔任政委，黃口頭應承過，不過之後就冇認數。

基本啲成員由旗派嘅差人、複退軍人、工人、幹部、學生等組成，下設咗參謀部、政治部、作戰部等機構，仲配備有三個「警備團」，另有一支「前線突擊隊」，會派出巡邏車喺市內巡邏。

紅警司除咗陣容強大，仲因為多次嘅武器奪取，而管有大批嘅長短槍，仲擁有火炮同裝甲車。

目標任務

組織自行原定嘅任務係：

1. 奪取「廣州陳再道」掌握嘅警司大權，
2. 奪取公檢法專政機關大權，肩負強化無產階級專政嘅責任。
   

活動

1967年8月11號廣州紅旗派主導嘅紅警司，喺海珠廣場中國出口商品陳列館召開咗成立大會，初頭嘅成員大概有兩百零人，有成百支槍。

紅警司成立後，立即接手咗廣州社會治安嘅維護，負責恢復公共交通，仲有處理當地嘅刑事案件。

而紅警司喺運動期間，同其他社團組織相互「串聯」，短時期營造咗一種「武裝的群眾專政」狀況，唔少嘅工業、商業、交通、財政同市管嘅大權從而被「造反派」攞到手，而呢陣時郊區好似石井、沙河、新窖、鶴洞、黃埔等地嘅農業大權，亦被「農民造反派」控制咗。

爭議案件

1967年8月發生咗多起流血事件，紅警司就偵查咗當中一個綁架殺害幾名鐵路中學造反派學生嘅血案，發現一名叫張金貴嘅人有殺人嫌疑而收押咗佢。時紅警司司令吳之偉同意咗王希哲嘅意見，暫唔處決張金貴。但引起咗鐵路中學等擁有武裝嘅造反派學生不滿。結果佢哋持械沖擊咗喺海珠廣場陳列館嘅紅警司囚室，強行綁走咗張金貴，帶到環市北路劉國旋做司令嘅21中學後山，亂槍打死咗張金貴。

勢力範圍

據點

喺1967年8月嘅時候，紅旗派佔領咗嘅據點如下：

• 海珠廣場中國出口商品交易會陳列館（舊館），
• 西堤南方大廈，
• 長堤愛群大廈，
• 廣州市二輕大樓，
• 廣州市工人醫院（而家嘅廣醫附一院址），
• 登峰南路（而家嘅倉邊路）廣州市房管局大樓。

轉變、鎮壓同收尾

1967年8月17號下晝，啲紅警司所屬社團嘅代表喺廣州機場，集隊準備到北京嘅時發生咗槍戰，嗰時候認為係警司做嘅事幹，就將廣州警司嘅政委羅興洲扣押埋，仲帶咗到北京隨身軟禁。喺會見周恩來嘅時候透露過軟禁嘅事，嗰時周恩來未有要求放人。而周恩來對紅警司有意取代公安同警司嘅傾向，係默許嘅。到咗八、九月間發生咗「武漢事件」之後，毛澤東改變咗態度，喺九月初發出「九五命令」（俗稱係交槍令），形勢變成要恢復警司嘅執法權力。封存啲武器嘅時候仲有唔少人唔肯放手，收尾軍訓團催促將啲槍枝彈藥裝車， 插埋彩旗同標語，敲鑼打鼓咁送到去梅花村軍區指定嘅交槍點。9月以後由廣東軍管會同廣東省革籌委會主持社會治安，紅警司就退出咗舞台。

1968年1月24號，周恩來、康生、陳伯達、江青、葉群、楊成武、姚文元、黃永勝等人喺接見湖南嘅群眾代表嘅時候，宣佈咗「湖南省無聯」係「反革命組織」。湖南群眾運動領頭嘅楊曦光，同時被扣上咗「反革命分子」嘅罪名而收監，老竇楊第甫就被株連逮捕，老母喺被人批門後自殺咗。由鎮壓湖南嘅社團運動開始，中共當局開始更收緊咗對「革命造反派」嘅縱容格局。

到1968年7月尾貫徹中央兩個佈告後，部分（造反派）群眾代表開始被批鬥同收押審查，代表嘅身份係名存實亡。 到咗秋天廣東省各級革委會相繼成立咗，群眾組織啲山頭就陸續咁被剷除，省革委仲針對所謂嘅「5.16 反革命集團」發起猛攻。省、市革委嘅政工組就全面咁清查原紅旗派委員，重點造冊同整理材料，唔少人就被押送去廣州警司、工糾或單位（部門）設立嘅「牛棚」審查批鬥。

睇埋

• 文革
• 警司