經略安撫使
經略安撫使，又叫做「安撫使」、「經略使」、「安撫大使」、「宣慰安撫使」、「宣慰使」、「宣撫使」等，名唔同但係做既嘢都一樣，係朝廷派去唔同地方，巡視同埋處理地方事務既官員，後嚟呢個位多數係高級軍官做。
「安撫大使」最早係喺隋朝，當時「安撫大使」係由行軍主帥兼職做，例如楊素就曾經坐過呢個位。喺唐朝，開始既時候，「安撫使」變咗係臨時派去各個道，負責處理事務既大臣。去到唐朝中期，呢個位取消咗。晚唐就變成喺戰爭或者天災既時候，朝廷派大臣巡視既官員，叫做「宣慰安撫使」或者「宣撫使」。
宋朝係用中央集權制，為咗避免藩鎮割據，地方上既「節度使」、「觀察使」都只係虛銜，實際工作係由直屬中央既「知州」做，但係「知州」管轄既範圍好細，不可以處理比較大既區域事務，呢啲嘢只係喺必要既時候，由「朝廷命官」做「安撫使」去管理較大區域既事務，例如宋真宗既時候，曾經派王欽若（當時既翰林學士）去做四川「安撫使」。
北宋偶然亦都會派樞密院大臣或者政事堂大臣去地方出巡，做啲掌撫綏邊境、安撫百姓同埋統護將帥、督視軍旅等既事，呢啲官員叫做「宣慰使」，後來演變成為戰爭時期，管轄一路或者幾路軍隊既統帥，叫做「帥司」。
南宋初期，每個路都設有「安撫使司」呢個位，但係廣東、廣西兩路既叫法唔同，仍舊喺「安撫」前面加返「經略」二個字，呢個位通常係由每個路既最重要嗰個州府既長官兼任，負責軍事同埋民事既工作。如果嗰個州府既長官係二品以上，就叫做「安撫大使」。
之後既朝代，大多經略安撫使都係統管軍民。明朝只叫「經略」，唔叫「經略使」，官階比總督略為高啲。清朝既「經略大臣」係封疆將帥裏面既最高級官員，官階一般係正二品或從一品。