綺羅光
綺羅．光（？—）係日本鹹濕小說（官能小說）作家，1984年出道[1]。出道作係《女教師．裕美の放課後》（1984）[2]，其他代表作有《牝猟》（1987）、《凌辱女子学園》（1987）、《姉と弟・相姦伝説》（《變態的雪白肉體》，1989）[3][4]、《美姉妹 恥辱の履歴書（下）》（《高樹三姐妹》，1989）[5]、《沙織》系列（1990，1991）、《女教師．弓香》系列（2007）、《人妻・愛虐巡礼》（2021）等等[6]。
作風
[編輯]佢嘅作品大多數涉及強姦凌辱做主題，內容亦經常會有毒品同黑幫。
佢早期嘅作品多數以「女教師」做主角，之後作品嘅女主角漸漸出現以「女高中生」、「已婚婦女」、「女大學生」、姐姐等身份登場。不過，官能小說中常見嘅「親生母親」同護士就少見於佢嘅作品中。佢書中嘅女主角大多數都係純潔、性經驗少（或者係處女）。作品中嘅已婚婦女，多數都係二十幾歲嘅後生女人。
情節方面，女主角通常過住正常生活，但係因某啲原因（通常係性照片、短片、聲帶等），畀施暴者操控或禁錮，從而陷入被凌辱嘅田地。唔少情節都係通過第一個施暴者勾結其他共犯（如黑幫嘍囉、富豪、教練、強姦犯等），帶出群交橋段，女主角慘遭淫辱，但係故事好少會出現令女主角懷孕嘅情況。女主角嘅真命天子通常會係故事結尾時出現，仲引伸出施暴者被繩之於法，結束性虐待。