老章麻雀

老章麻雀係一個麻雀術語，講嘅係一種蔴雀玩法，而呢種玩法，亦係蔴雀最最最原本嘅玩法。不過而家流通緊嘅老章麻雀，其實只係五十年代之前嘅玩法，至於再早可以早到幾時，就無從稽考，不過已經可以講老章麻雀就係最原本嘅蔴雀玩法。

簡史

蔴雀最原本嘅玩法其實已經無從稽考，老章麻雀只可以話係最接近原本玩法，因為最原本嘅蔴雀同而家其實有好大分別，無論喺牌數同各門牌嘅稱呼都同而家嘅蔴雀唔同，而老章麻雀就係最接近而家蔴雀嘅最原始玩法。而家所有而家流行嘅蔴雀玩法，大致上都係由麻雀傳入咗唔同嘅地方，經唔同地方嘅文化影響，簡化咗之後演變出嚟，有人認為，如果無咗呢個簡化過程，蔴雀跟本唔會興起。

老章基本玩法

基本上老章麻雀同天九玩法好似，都係以閒家鬥莊家咁玩，例如閒家同閒家之間輸贏都以單計，但係莊家贏或者輸都係計雙，而家嘅蔴雀，莊家輸贏都只係計多一番，所以「莊」呢個角色喺老章麻雀入面同而家好唔同。

副

老章麻雀每舖勝負用「副」（亦稱「符」) 為基本計算單位。和牌（食糊）以後，四家都要算自己手牌嘅「副」數。一般計法，每刻兩副；一九或番子四副；暗刻雙計；槓牌再雙計；暗槓又再雙計。例如：碰二筒，兩副。碰紅中，四副。暗刻一萬，八副。槓二索，八副。暗槓白版，三十二副。而和牌嘅一家，先加十副 （稱為平和十副）。自模、單叫、對碰、卡嶐等等，再加副。

副數加完即為底數。得到底數， 再計番。

牌中有中發白或者門風成刻，副數一番（即底數乘二）。和牌一家，若係清一色，副數再三番即八倍。

每家計好自己副數後，和牌一家向三家收取自己副數。其餘三家，亦各自向對方收取自己副數。莊家無論贏輸全部雙計。

老章之下，未曾和牌一樣可以按副收錢。換句話講，只要手牌副數夠一樣有錢贏。特別莊家贏輸都要雙計，所以老章麻雀，容易出現閒家之間互相放銃，累莊家輸錢。

參考

• 《麻雀實戰問答》 ISBN 962-14-2980-3