耶律善才

耶律思忠（1172年—1232年），字天祐，小字善才，係遼太祖大仔遼義宗耶律倍嘅八世孫，金朝嘅政治人。

耶律辨才阿爸耶律履喺金章宗明昌初年嘅尚書右丞；大哥耶律辨才係金朝奉國上將軍、武廟署令；三弟耶律楚材係元朝中書令。耶律善才以宰相個仔身份引見，補東上閣門祗候。泰和四年（1204年），調任衡水令、蘭州軍事判官，入為西山閣門簽事。大安二年（1210年），改任太子典儀，後轉裁造署令。貞祐二年（1214年）宣宗南渡，耶律辨才同耶律善才做護衛，善才因功授儀鸞局使。冇幾耐，佢遷太府少監，兼直西上閣門尚食局使。貞祐三年（1215年），外派為同知昌武軍節度使事，之後改章化軍。佢又做過嵩、裕、息、延四州嘅刺史、同知鳳翔府事、中京副留守、同知歸德府事。

金正大九年（1232年）正月，汴京被包圍，耶律辨才、善才兩兄弟當時都喺汴京，耶律楚材奉召索回佢哋兩個人北歸。二月，金哀宗喺隆德殿召見辨才、善才兩兄弟，兩人懇求留喺汴京，哀宗贈金幣堅持要佢哋返回北方，於是耶律辨才返回真定，善才就喺二月十七日喺內東城濠投水死，皇帝為之震悼，封贈善才為工部尚書、龍虎衛上將軍。

妻子姓郭，個仔耶律鈞，男孫耶律寧壽、耶律昌壽、耶律德壽。

參考

• 元好問《龍虎衛上將軍耶律公墓誌銘》
• 王國維《耶律文正公年譜》