耶律阿保機

耶律阿保機（872年—926年），又叫耶律億，係大遼第一位皇帝，尊稱遼太祖。

耶律阿保機嘅前輩係契丹迭剌部嘅酋長同軍事首領。佢喺901年被擁立為軍事首領，之後冇幾耐就做酋長。佢以武力征服契丹附近嘅地區，捉咗好多漢人同其他族裔嘅人。907年佢被選為部落聯盟嘅首領，連任九年。佢利用漢人，並且採納佢哋嘅建議，決定要將三年一次嘅選舉制度改為世襲制度。對此感到不滿嘅部落首領反抗（諸弟之亂），但係就畀耶律阿保機伏殺，佢仲乘機統一埋契丹各個部落。916年3月17號，耶律阿保機登基稱帝，立國號契丹（後來被改做遼），建年號為神冊。此外佢仲命人建立契丹自己嘅文字。

耶律阿保機建國之後繼續進攻喺佢周圍嘅民族同政權，渤海國、室韋同奚分別畀佢消滅。