色調變換

色調變換（palette swap）係廿世紀電子遊戲設計常用嘅一種做法，指喺做圖像設計嗰陣，將一個圖像物件設成有幾個可能嘅唔同色調。舉個例說明，喺廿世紀嘅格鬥遊戲當中盛行一種做法，就係每個角色都有一柞圖代表佢嘅唔同樣（企喺度嗰陣嘅樣、出拳嗰陣嘅樣、同跳起嗰陣嘅樣等），而每個角色嘅每幅精靈圖都有原色版本同變咗色嘅版本，而如果兩個玩家都揀咗用同一個角色嘅時候，隻遊戲就可以用原色版本顯示玩家一個角色，變色版本顯示玩家二嘅角色，就可以防止因為兩個角色望落一樣而混亂嘅情況。有陣時亦都因為啲製作師想慳時間，想用同一柞精靈圖或者同一個立體模型代表兩個唔同嘅角色，所以就俾兩個角色用同一柞精靈圖或者同一個立體模型，但色調唔同。