英國公共房屋
英國公共房屋（公屋），又叫做議會房屋（Council Housing）或者社會房屋（Social Housing）係英國喺2011年之前出租房屋嘅主要來源。到咗2011年，住喺私樓嘅家庭數量超過咗住喺公屋嘅家庭數量。
英國嘅公屋最初主要係由地方議會（Council）起嘅，所以又叫做議會房屋（Council Houses）；到咗上世紀80年代，非營利房屋協會（non-profit housing associations）起嘅公屋越來越多，所以依家啲公屋又叫做「社會房屋」（Social Housing）。喺技術嘅角度睇，議會房屋只係指地方議會擁有嘅房屋，不過喺好大程度上，議會房屋同埋社會房屋呢兩個術語係可以互換嚟用嘅。
喺1865年以前，窮人都係住私人房屋嘅。 後來，地方議會開始起屋俾窮人住，呢啲喺蘇格蘭叫做計劃（Schemes）屋嘅住宅裡面會有其他設施，例如學校同埋舖頭。 1950年代開始，議會開始起多層公屋同埋三、四層高嘅複式公屋，同時大規模咁起排屋。
建造議會房屋嘅目的係為低下階層提供唔太迫、品質良好嘅住宅，用合理嘅租金租俾佢哋。上世紀中葉嘅議會房屋，多數係排屋同埋半獨立住宅，通常喺附近會有學校、商舖，同埋其他設施。到咗上世紀70年代尾，接近三分之一嘅英國家庭係住喺公屋度。
喺1979年，因為立咗購買權法（Right to Buy legislation），議會開始將佢哋嘅公屋賣俾住客，而之後新起嘅社會房屋主要係由房屋協會開發同埋管理。喺2010年，大約有17%嘅英國家庭仍然住喺議會房屋，大約55%嘅社會房屋係由地方當局擁有。