荔枝碗船廠

出自維基百科,自由嘅百科全書

荔枝碗船廠澳門冇咗嘅船廠,喺路環荔枝碗村。

背景[編輯]

之前,神香、爆竹同火柴業被視為支撐澳門經濟嘅三大傳統行業;但事實上,當時本地造船業一樣係蓬勃發展,甚至被認為係第四大傳統行業。響1970年代,荔枝碗係澳門其中一個重要造船區,師傅同工人馬不停蹄咁做嘢,為漁民同商人起佢哋嘅船,但係而家嘅啲光景都已經唔存在[1]

隨著澳葡政府對路環嘅佔領,路環村開始從傳統中式村落蛻變做西式小鎮,而居民亦開始向村落北邊發展,船人街上依山起嘅屋相信都係嗰陣出現。至於荔枝碗船廠,相信都係二十世紀中葉出現。初期船廠只係維修船隻,慢慢咁開始變成造船廠。荔枝碗響1966年而經有「信榮」、「周家」、「范九」、「新合利」、「協利」同「關恩」,加埋六間船廠,而路環造船分會亦響1968年響路環市區成立。可以睇到,荔枝碗船廠響六十年代嗰時基本形成[1]

荔枝碗嘅木廠為船廠提供造船需要用到嘅木同部件,原木一般都係會先運到木廠,經過加工之後先會運到船廠。至於拆船廠,顧名思義就係專門拆散一隻船嘅工場。雖然啲船運到拆船廠嗰時已經爛榕榕,但部分部件同木材都可以循環再用。響拆船廠分解同再造嘅廢船木材同部件,同樣可以為船廠提供造船材料。小型工場同機械鑄造鋪頭為船廠提供其他修理同鑄造服務。可以睇出,荔枝碗村嘅造船工作唔止船廠組成,而且包括其他同造船相關嘅工業廠房[1]

今日睇到嘅船廠已經爛榕榕,但係澳門係經常有颱風吹襲,船廠重仍然保持原來面貌。即使係踏入二十世紀後期,荔枝碗船廠設計依然殘舊,船廠都會起響斜面沙灘上,而且用木同鐵響沙灘上起成大型嘅工作平台。廠入面嘅寫字樓一般起響入口或者閣樓上,而供奉神台都會起響門口到,重有一個地方擺造船架生同消防設備。響全盛時期,船廠會接到唔少訂單,船主會先來到船廠工地旁邊嘅寫字樓同「大班」傾隻船嘅設計。之後,大班會對一班造船工人講隻船嘅設計,而工人會返到自己嘅崗位開工[1]

由於荔枝碗村係基於造船行業而成,所以「村民」都係造船工人同佢哋嘅家屬,形成一個小社區。不過隨著造船業沒落,荔枝碗船廠亦慢慢咁停工,工人為生活,將全家搬返市區生活,荔枝碗村響度慢慢消失。今日出現響荔枝碗嘅人主要係來嘆漢記手打咖啡嘅遊客,同埋回味造船業昔日風光嘅人士,重有繼續響村入面住嘅居民[1]

清拆[編輯]

2016年4月7號,路環荔枝碗村有廢棄船廠發生傾斜事故,有居民聽到船廠入面出現聲響,擔心佢會冧,所以報警求助。消防接報後到場檢查,未有發現即時危險,並將船廠圍封,而工務局亦派人嚟查。根據記者現場咁睇,雖然船廠重未冧,但係其中一邊支撐屋頂嘅樑柱經已經出現傾斜,天花木樑同鋼樑受壓彎曲,屋頂鐵皮亦被壓到變形。船廠入面用木搭建嘅平台亦嚴重彎曲,木架、吊機搖搖欲墮。雖然船廠出面已經拉咗封鎖線,但都重有少數遊人越過封鎖線入去影相。有幾間村屋緊靠響船廠隔離,雖然暫時未有受到影響,但係如果船廠冧咗,可能會影響居民安全[2]

有住響荔枝碗村好多年嘅居民話,喺4月7號同8號朝早先後聽到船廠出現聲響,發現船廠結構出現傾斜,之後有消防同工務局人員到場檢查,重拉起封鎖線,唔畀途人入去。佢話,船廠已經荒廢好多年,受盡風吹雨打,但係回歸之後就好少見到有人來修葺,令到船廠入面爛榕榕,擔心一落雨、打風,船廠就好容易冧[2]

[編輯]

  1. 1.0 1.1 1.2 1.3 1.4 (繁體中文)荔枝碗的船廠遺址,論盡傳媒,2017年2月3號。
  2. 2.0 2.1 (繁體中文)路環船廠出現傾斜 結構受損 林發欽:政府應加快活化荔枝碗村,論盡傳媒,2016年4月9號。