荷蘭拍賣

出自維基百科,自由嘅百科全書
跳去導覽 跳去搵嘢
德國果欄搞嘅荷蘭拍賣

荷蘭拍賣Dutch auction),或者叫荷蘭式拍賣減價拍賣,係種拍賣制,個名嚟自用呢種方式嘅荷蘭花拍賣場,而家通常指賣家由高到低叫價,直到有買家接受叫價而成交嘅拍賣形式。

傳統嘅荷蘭拍賣入面,會有一個數量嘅貨拍賣,由買家提出最高接受價,出價最高嘅買家中標,而成交價一律係所有中標買家入面出嘅最低價,但如果成交價低過賣家出嘅最低接受價,就會流標。

亦有啲荷蘭拍賣無跟到「成交價一律係所有中標買家入面出嘅最低價」嘅傳統,直接按照各個買家出價做各自嘅成交價。

舉例[編輯]

下面係荷蘭拍賣嘅一個舉例,假設有10箱蘋果賣,買家出價情況:

買家 競投量(箱) 競投價(每箱)
A 2 $2,000
B 5 $1,800
C 4 $1,700
D 8 $1,600
E 6 $1,550

最高價嘅10箱中標,即係A(2箱)同B(5箱)全數中標,而C嘅其中3箱中標。如果跟傳統荷蘭拍賣嘅規矩,10箱嘅成交價都會跟C嘅出價$1,700,賣方攞到 $1,700 x 10 = $17,000;但如果個拍賣無呢條規矩,買家會照跟返自己嘅出價成交,賣方就攞到 ($2,000 x 2) + ($1,800 x 5) + ($1,700 x 3) = $18,100。