葡京沙圈
想搵第二個意思嘅話，請睇沙圈。葡京酒店地庫商場有條圓形迴廊，以前有班着得好性感嘅妓女喺道兜兜轉轉，畀嫖客揀嚟幫襯，就好似啲馬喺沙圈入面行嚟行去，於是就俾人冠以葡京沙圈（或者馬圈）之㖸稱；呢個架步聞名世界，吸引到大把港台同外國游客嚟尋歡或者純粹參觀[1]。雖然其他賭場都有企街妓女，但係佢哋嘅作風低調得多。
史
[編輯]葡京沙圈响1970年代末成形，隨住當地流行艷舞表演而出現，啲流鶯起初以俄羅斯人為主；到咗1980同1990年代，澳門日式夜總會盛行，葡京沙圈妓女變成以北姑為主[2]；上者沒落，桑拿浴室乘勢而起，有揸住工作簽證嘅真假骨妹做雞，喺嗰道揾嫖客；揸住旅遊證件，喺澳門做一樓一鳳嘅私娼，亦大有人在[3]。
响2000年，葡京酒店設立制度管理該處淫業，只准佢哋嘅撈女（縱然都冇職員身分）喺嗰處揾食，並限定呢班人准租焉啲房間；野鷄會被看更趕走[4]。到咗2013年，套制度大改，變得唔止精密，重會主動招募妓女，同收佢哋好多錢，形成咗個不折不扣嘅賣淫集團[5]。
長年以嚟，澳門政府對於黃業，隻眼開隻眼閉，通常只係捉下賣淫者，罰啲錢；若果發現唔係當地人，重會踢走埋添[6]。响2015年1月10號，司警走去拉人𢫏檔[7]，拘捕3個澳門人、2個大陸人同1個香港人而開始羈留，帶走95個大陸同1個越南妓女協助調查，重通知埋大陸相關部門做嘢[8]，葡京沙圈成為歷史[9]，被叫做舊沙圈。高天賜推測，呢次行動係中共中央推行反貪腐政策，洗太平地嘅表現[10]。
响2016年3月17號，初級法院判何猷倫、王巧遇、倫國強、麥德才、喬艶艶同潘湛源操縱賣淫罪成立；除王以外，統統視作已完成服刑而放走；只有潘唔係葡京賭場正式職員[11]。中級法院响2019年12月1號，判佢哋6個更多罪名成立，監禁年期大增；何嘅改判罪名為創立並領導犯罪集團罪同58項操縱賣淫罪，王、倫、麥、喬嘅改判罪名為參加犯罪集團罪同58項操縱賣淫罪，潘嘅改判罪名為參加犯罪集團罪同3項操縱賣淫罪；冚唪唥要（再）入冊[12]。
攷
[編輯]- ↑ 〈葡京鶯燕成群 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2004-03-30。喺2021-07-18搵到。
- ↑ 〈沙圈始於70年代 澳掃黃配合中央反腐〉。《on.cc東網》 (香港中文)。2015-01-12。喺2021-07-19搵到。
- ↑ 〈探射燈：濠江娼盛 始於70年代 - 東方日報〉。orientaldaily.on.cc。喺2021-07-19搵到。
- ↑ 〈前總經理撑何猷倫 沙圈運作免群鶯亂舞〉。www.bastillepost.com。2016-02-24。喺2021-07-20搵到。
- ↑ 〈15萬「入閘」妓女5級制 葡京沙圈運作揭秘 - 樂在澳門 - 澳門快訊〉。《東周網【東周刊官方網站】Eastweek.com.hk》 (臺灣中文)。喺2022-05-18搵到。
- ↑ 〈探射燈：嫖妓不違法 賣淫僅罰款 - 東方日報〉。orientaldaily.on.cc。喺2021-07-19搵到。
- ↑ 〈涉操控葡京沙圈賣淫集團 何鴻燊姪被捕〉。《on.cc東網》 (香港中文)。2015-01-12。喺2021-07-19搵到。
- ↑ 〈澳門消息：葡京高層涉包庇「沙圈」妓女被捕〉。《on.cc東網》 (香港中文)。2015-01-11。喺2021-07-20搵到。
- ↑ 〈澳門的「沙圈」，只能在博物館裡重溫 | 輔仁文誌〉。www.vjmedia.com.hk。原著喺2021-07-22歸檔。喺2021-07-22搵到。
- ↑ 〈探射燈：中央整頓澳門淫業大清洗 - 東方日報〉。orientaldaily.on.cc。喺2021-07-19搵到。
- ↑ 〈何猷倫僅1項操控賣淫罪成立 市民︰澳門是犯罪天堂〉。《論盡媒體 AllAboutMacau Media》。2016-03-17。喺2021-07-22搵到。
- ↑ 力報。〈沙圈案改判 檢方上訴得直 何猷倫改囚八年〉。《力報》。喺2021-07-18搵到。