蕃坊
蕃坊係唐、宋時喺廣州、泉州、杭州設嘅外國僑民居留地，多係阿剌伯人同波斯人，設有教長、審判長來管理僑民，又叫番坊、蕃巷，蕃嘅意思就係外國。
史
[編輯]唐朝嘅時候，中國同西域關係冇咁好，時不時打仗，令陸上絲綢之路式微，於是海路取代陸路成為來華通商嘅重要路線，同時當時航海技術亦發達過從前。呢個時候阿剌伯帝國興起，佢哋重商，而唐朝國家開放，於是從中國到南洋、波斯灣地區形成咗六條定期航線，全部從廣州出發，其中最出名嘅係「通夷海道」，於是首先廣州有外國人居留。喺唐高宗顯慶六年（西元661年），喺廣州設市舶司，總管海路邦交外貿。
因為當時嘅船係帆船，為咗順風順水，行船要睇季風變化，於是外國嘅商人、使節往往要喺中國住幾個月先走得，噉呢段時間內佢哋要食宿、採購，為咗方便管理，亦都出於華夷之辨嘅觀念，政府唔想外國人同唐人混居、驚會擾亂當地，於是喺唐開元二十九年（西元741年）喺廣州城外劃咗笪地畀外國人住，叫做蕃坊，設蕃坊司同蕃長來管理。
此外泉州喺城南設蕃坊，而杭州設喺城東清泰門內。
啲外國僑民保留咗佢哋嘅語言、穿着、生活習慣、宗教信仰，因為多數係來自中東，所以有清真寺同清真市場，泉州嘅聖友寺、廣州嘅懷聖寺都係舊日蕃坊嘅清真寺，其中廣州懷聖寺係中國現存最早嘅清真寺，佢入口石匾寫嘅阿剌伯文意思係「中國第一間清真寺」。
唐代廣州蕃坊有12萬到20萬僑民，後來黃巢起義攻打廣州，由於蕃商有錢，啲人仇富排外，爆發廣州大屠殺，幾乎殺盡20萬僑民。
到宋代蕃坊重新興盛，令蕃坊設有專供外商交易嘅蕃市，以及蕃學（僑民學校）。後來宋元時期定居廣州嘅蕃商成為今日廣州回族嘅祖先。
元代時廣州地位畀泉州取代，蕃坊亦隨之衰弱。
唐代時蕃商中波斯人最有錢，到宋代係阿剌伯，嘉定年間蕃商曾出資修泉州城。
管理
[編輯]裁判上，唐代根據唐律疏議：「諸化外人同類相犯者，各依本俗法，異類相犯者以法律論」，呢個係官方懷柔遠人政策，並非特權；明朝就一概以大明律法論，冇中外之別。蕃坊有蕃長一個，由中國官府從蕃坊居民中挑選一人任命，蕃長嘅衣冠同中國官員一樣。
廣州蕃坊
[編輯]廣州蕃坊呈長方形，以懷聖寺為中心，東到米市路、朝天路，西到人民路，南到當時珠江邊（今日惠福西），北到中山六路。
今日蕃坊範圍內嘅路名都係同當時蕃商相關，有啲名甚至係用阿剌伯話起嘅，後來用漢字記低。
- 光塔路原名大食巷，係大食國（阿剌伯）人聚居地
- 仙鄰巷源自阿剌伯話「中國」嘅音譯，同時因為喺五仙觀隔離而揀字記音。
- 甜水巷源自阿剌伯話」中國山頭」，古時嗰度有個山頭，比如附近有坡山巷、坡山古渡地名。
- 瑪瑙巷，因波斯人經營珍珠瑪瑙而得名
- 擢甲巷源自阿剌伯話「巷仔」
- 海珠中路南段原叫鮮洋街，源自阿剌伯話「送別」，因為當時珠江就喺附近，唐朝要求廣東地方官府一律設宴餞行歸國外商。
- 詩書路係「獅子」嘅諧音，獅子國即係斯里蘭卡。
- 蓬萊北源自清真教喚禮詞「真主至大」嘅音譯。