虛詞

喺語言學，虛詞（粵音：heoi1 ci4），又叫功能詞，係一大類嘅詞語，冇咩實際意思，但喺語法或者語用方面有重要功能，冇咗呢啲字詞就難以構成語句。一般嚟講，諸如介詞（由、喺、畀）、連接詞（同埋、或者、定係、如果）、助詞（嘅、㗎、咋、喎）、副詞（例如唔、好、啱啱）同埋量詞等都會當係屬於虛詞，而英文同德文等歐洲語言常見嘅冠詞都算係虛詞。

虛詞負責標示詞語間嘅語法關係，構成句子，亦可以表達講嘢嘅人嘅情緒或者態度。唔似得實詞噉，會指具嘅事物、動作同特性。而事實表明，編寫字典嘅人能夠為名詞同動詞等嘅實詞提供具體定義但係對於虛詞，字典就好多時都只能夠講佢哋嘅用法。

特性

睇埋：封閉詞類、文法關係同揳夫簡潔定律

一般嚟講，以下嘅詞類都會當係虛詞，附帶英文例子：

• 冠詞 —— the 同 a。喺某啲有詞形變化嘅語言入面，冠詞可能會跟隨後面嘅名詞嘅格變化。
• 代詞 —— he :: him、she :: her 等 —— 喺英文入面有詞形變化。
• 介詞 —— in、under、towards、before、of、for 等。
• 連詞 —— and 同 but。
• 從屬連詞 —— if、then、well、however、thus 等。
• 助動詞 —— would、could、should 等 —— 有詞形變化。
• 語氣詞 —— up、on、down。
• 感嘆詞 —— oh、ah、eh。
• 代句詞 —— yes、no、okay 等。

虛詞通常唔可以獨立成句，少數例外有普通話嘅不（口語中可以單獨出現，自成一句句子）噉。

虛詞都屬於封閉詞類，即係話隻語言嘅母語使用者好少可會喺呢啲詞類度加入新詞。相比之下，好似名詞、動詞、形容詞同多數副詞... 等嘅實詞，就傾向係開放詞類，可以不斷有新詞同外來詞出現。

响音系上，虛詞可能同實詞有某啲系統性質嘅差異。例如廿一世紀初嘅英文噉，英文有濁齒擦音（國際音標：[ð]）呢個輔音，慣常書寫做 th- ，而呢個輔音常見於 this 同 that 等嘅功能詞，反觀實詞就好少會用呢個輔音。

虛詞同實詞亦可以喺寫法上有差異。例如英文啲功能詞傾向跟從三字母法則，即係寫嗰陣少過三隻字母，而相比之下，實詞書寫上大多數都超過三隻字母。亦可以睇睇揳夫簡潔定律講嘅嘢。

例子

粵語嘅虛詞包括咗各種嘅副詞、介詞、連詞同助詞。粵語嘅副詞大致上有：

• 表示程度：好、非常、勁、太、至、最
• 表示範圍：都、冚唪唥、淨係、齋
• 表示時間：先、仲、再、啱啱、間中
• 表示否定：唔、冇、未
• 表示情態：梗係、實係、直頭

... 等等。

文言文、中文書面語以至英文同葡文等嘅歐洲語言都各有自己嘅虛詞，用嚟組成句子。

睇埋

• 實詞
• 詞性
• 文法化

外拎

• （香港繁體） 18 個常見文言文虛詞｜例子練習｜完整列表，AfterSchool