表格

  呢篇文講資料表達方式。想搵文件嘅話，請睇表格文件。

呢個表格，表示緊某間公司喺二〇〇六年買咗咩架生，帶有圖像、描述同埋價錢等嘅資訊。

表格（粵拼：biu2 gaak3 ），簡稱表，係一種資訊或者數據嘅表達方式，通常由行同列交錯嘅格仔組成，但亦可以係更加複雜嘅結構。表格喺學術研究、數據分析等工作上有廣泛應用。

基礎

表格由以下呢啲部份組成：

• 行（粵拼：hong4；英文：row）：打橫排列嘅一列列格仔，喺關係數據庫之中，每一行代表一個個案。
• 列（英文：column；粵拼：粵化口語音：ko1 lam4）：打戙直向排列嘅一列列格仔，喺關係數據庫入便，每列通常代表一個變數或者「特徵」，每列最頂會有個名（表頭）描述嗰個變數或特徵係乜。
• 格（英文：cell；粵拼：粵化口語音：seu1）：行同列交叉嘅位置，就係一個格仔，用嚟裝實際嘅數值或者文字。
• 表頭（英文：header）：通常擺喺成個表格嘅最頂，用嚟標明每一列係咩意思。

更進階嘅做法，表格仲可以有中繼資料等嘅資訊。

例一

例子一：茶餐廳餐牌

餐牌冧把	餸菜	價錢（港幣）
A1	火腿通粉	$28
A2	餐蛋麵	$30
A3	菠蘿油	$12

解釋：

• 呢張表格有三行數據（A1、A2、A3），每一行記錄一份餐牌。
• 有三列，三列嘅表頭分別為：餐牌冧把、餸菜、價錢。
• A2嗰行同餸菜嗰列交叉嗰格，係一個格，其內容為餐蛋麵。

例二

例子二：港鐵站名

站名	線路	區域
油麻地	荃灣線	九龍
銅鑼灣	港島線	香港島
大圍	東鐵線	新界

解釋：

• 呢張表格有三行數據，分別代表三個車站。
• 有三列：站名、線路（屬邊條線）、區域。
• 例如銅鑼灣同線路交叉位，係一個格，顯示內容港島線。

應用

數學

睇埋：算術同統計

乘法表係表格嘅常見應用。乘法表表達數，用嚟顯示兩個數相乘嘅結果。喺小學數學當中，乘法表係基礎嘅算術教育工具。以下係簡化版嘅乘法表，淨係包含 1 到 5 嘅相乘結果：

×	1	2	3	4	5
1	1	2	3	4	5
2	2	4	6	8	10
3	3	6	9	12	15
4	4	8	12	16	20
5	5	10	15	20	25

亦可以睇睇邏輯學常用嘅真值表。

科學

無論係自然科學定社會科學，科學靠嘅係實證，所以必然涉及數據（數據反映對現實世界嘅觀察）。數據集成日都會以表格嚟表達。以下係宏觀經濟學嘅數據集例子，假想而家係想研究經濟增長會受咩因素影響：

城市	年份	GDP (以十億美元計)	通脹率 (%)	失業率 (%)
光舟	2010	1500	2.1	5.0
鄉港	2015	2100	1.8	4.3
懊門	2010	800	3.5	7.2
拮龍波	2020	500	4.0	10.5
溫歌樺	2015	1200	2.9	6.1

此外，科學表格仲有元素週期表等。

其他

• 時間表

數據表

數據相關嘅概念，成日會用到表格：

• 自變數
• 應變數
• 統計圖
• 關係數據庫
• 闊同窄數據

睇埋

• 矩陣
• 張量
• 數據庫
• 抽象資料類型