角一
(由角宿一跳轉過嚟)
角一係星官角第一粒星，係佢嘅南星，因為角喺角宿之下，所以又叫角宿一。西洋叫Spica (讀/ˈspaɪkə/)，係室女座最光嘅星，叫所以叫室女座α星 (α Vir；α Virginis；Alpha Virginis) 。粒星係全天第十六光嘅星[1]，光度一等。室女座嘅星都比較暗，唯獨佢係特別光[1]。
北半球來講，春夜望東南會見到角一。沿住北斗七星嘅斗柄，同埋牧夫座嘅大角，連成曲綫，向下望就見到。
角一喺天球南緯約莫11度，同時亦坐喺黃道偏南少少嘅位，所以有機會畀月球或者其他行星遮住，即係掩食，亦即係行星掩星。
物理性質
[編輯]角一離地球262光年[1]。因為地球來睇係一等星，推算佢嘅光度係太陽2100倍。實際上，角一係一個雙星系統，係兩粒星嚟嘅，兩粒星好近，夾埋成爲互相圍繞公轉嘅雙星。兩粒星只係相隔0.12天文單位，公轉軌道周期4.0145日。兩粒星光譜都係高溫嘅B型，分別係B1同B4。分類上係藍矮星，有中等強度氫譜線，同時佢哋都係仙王座β型變星，所以角一個光度會徘徊喺0.97到1.04之間[1]。角一亦係全天最光嘅旋轉橢球變星。
角一係最熱嘅一等星之一，高溫令佢放出高強度嘅紫外線，實際上，角一係比人眼睇到嘅更光。
文化意義
[編輯]秋季太陽會經過室女座，咁所以角一象徵秋收。洋名Spica，就係拉丁文中spīca virginis，即係【室女嘅麥穗】。畫圖嗰陣會係女神左手抱住麥穗[1]。