謎語
謎語（粵拼：mai4 jyu5 ），又有稱為隱語，係一啲齋靠字面解唔會解釋得到嘅語句。謎語會以隱晦、曲折嘅表達方式，玩弄語言同文字。出謎語嘅人會出一段語言或文字做謎面，謎面會將某個事物、概念或者文字包裝喺一句話入面，叫其他人估詞語、人名、地方名等嘅嘢，其他人可以根據謎面刪增文字、改變文字音調等嘅方法去估謎底。
粵語例子
[編輯]謎面：阿明一個人喺屋企，唔開燈，唔開窗，點解可以睇到嘢？
謎底：因為佢開咗電視。
謎面：咩嘢越洗越污糟？
謎底：水，因為用嚟洗嘢嘅水會越洗越污糟。
歷史
[編輯]
謎語喺中國歷史悠久，有可能追溯到上古時代嘅《易經》。《易經·歸妹·上六》有句[2]：
女承筐，無實；士刲羊，無血。
據講呢句嘢嘅謎底係剪羊毛，噉係因為女子攞住個筐但入面冇嘢，男子劏羊但冇血，暗示只剪毛唔殺羊。
有秦客廋詞於朝，大夫莫之能對也。
講述有秦國嘅客人喺朝廷上講咗句隱晦嘅話，群臣都答唔出，顯示咗謎語（或者至少好近似謎語嘅嘢）嘅存在。
到咗宋朝，周密嘅《齊東野語》就有噉講：
古之所謂叟辭，即今之隱語，而俗所謂謎。
顯示咗謎呢個詞喺當時嘅民間已經普及，而且廣被視為隱語嘅同義詞。及後到咗南宋時期，上元節期間，人會將謎語寫喺花燈上，俾人一邊觀燈一邊猜謎取樂，呢種活動叫做猜燈謎，呢種活動一路去到明朝[3]以至現代，都仲有人會玩[4]。
神話
[編輯]
謎語呢樣嘢喺歐美都有文化意義。譬如希臘神話中嘅斯芬克斯（英文：Sphinx ）就好出名。斯芬克斯係一隻有獅子身體、女人頭同翼嘅怪獸，相傳佢守住底比斯嘅城門，會向過路嘅人出謎語，答唔到嘅人就會俾佢殺死。當中佢最出名嗰個謎語係[5]：
有邊種生物朝早用四隻腳行路，晏晝用兩隻腳行路，到咗夜晚就用三隻腳行路？
－喺原版個故仔入便，正確答案係人，因為人仲係蘇蝦嗰陣要用手腳（一共四隻）爬行，大個咗就用兩隻腳行路，年老嗰時就要用拐杖，變成「三隻腳」。希臘神話相傳伊底帕斯成功解開咗呢個謎語，令到斯芬克斯因此跳崖自殺而死，解救咗底比斯。
到咗廿一世紀初，唔少歐美嘅人一講起謎語就會諗起斯芬克斯嘅傳說。甚至仲有奇幻主題嘅視像遊戲等嘅創作品由呢個故事中取材，好似魔法風雲會以及龍與地下城等嘅奇幻遊戲，都有用到斯芬克斯嘅形象[6]。
睇埋
[編輯]引述
[編輯]- ↑ （香港繁體）（粵文） 【中秋燈謎2024】50條經典猜燈謎題目合集！香港廣東話猜字＋成語俗語＋明星＋物品＋食物（附謎底）
- ↑ 《易經·歸妹·上六》
- ↑ 《春燈謎》
- ↑ （香港繁體）（粵文） 猜燈謎｜中秋節必玩 15條爆笑廣東話燈謎 香港人先識答，有線生活
- ↑ Grimal, Pierre (1996). The Dictionary of Classical Mythology. trans. A. R. Maxwell-Hyslop. Blackwell Publishing.
- ↑ All Sphinx riddles and solutions in Dragon’s Dogma 2. Polygon.