打交
(由講手跳轉過嚟)
 |
打交，係出手出腳，互相攻擊嘅行為；用到威力頗低嘅架生時，例如棍，都會叫做打交。若果武器殺傷力大，例如利刃，就會用到開刋、劈友、械鬥等詞語，多數唔算打交。
細路仔打交有時當玩，係習武之源，好似細鳳好細個已經鍾意玩打交，收尾成為李小龍。
打交唔同打人，前者有拳來腳往嘅意思，後者所指嘅係一方打一方捱嘅情況。
同「打」近義嘅「毆」字，可以同某啲字配合成貶義詞——例如：毆打代表其中一方冇得／冇（乜）本事還手，當強方有幾個人又圍困到弱方，又叫圍毆；毆鬥指場交打起嚟好唔光彩……
彼此都有功夫底子，並且遵守規則嘅打交，又叫做比武／比試／講手，雙方鬥體力、反應、技術同埋心理質素，中國師傅講話係包括埋比武德。[1]
有傳「打交」演變自交打。打架係唔少其他品種中文（包括現代漢語）嘅詞語，唔係粵文咖。[2]
兩個人打交，又叫單挑或者隻揪；人多啲嘅話，稱為打群交。