賭團（粵拼：dou2 tyun4）即係規定參加者要賭錢嘅旅行團。商家會以免費或平價嘅衣食住行及吃喝玩樂，嚟招徠客人，一般條件係佢哋要買入某個數額嘅泥碼。因為賭場有莊家優勢，所以只要賭客冇出千，賭枱帶嚟嘅收入，就會大概同泥碼嘅價值掛鈎，於是唔難決定應該支出幾多；雖然一眾賭客拉匀會輸錢，但係只要賭場冇使詐，就會有部分贏錢離場，於是有大把人願意碰下運氣。呢種旅行團有好多都唔由賭場包辦，部分工序會外判出去。
