超級炸彈人2

（英文）北美版嘅封面；喺畫面中白色炸彈人喺度轟炸身為奸角嘅凶惡炸彈五人眾。

超級炸彈人 2（日文：スーパーボンバーマン 2 / Sūpā Bonbāman Tsū ）係由 Hudson 開發嘅動作迷宮遊戲，喺一九九四年推出，出喺超任平台上，係超級炸彈人嘅續作。插手掣嘅話，呢隻遊戲最多可以容納四位玩家一齊玩。隻遊戲有兩個遊戲模式，正常模式係一位玩家單獨闖關，而對戰模式就係最多四位玩家對局。

正常模式

本作闖關模式嘅截圖：玩家控制白色炸彈人，最上嗰條 bar 顯示（由左至右）玩家目前有幾多分，本關仲有幾多時間淨、玩家有幾多條命同埋能力係幾多。

睇埋：超級炸彈人 § 正常模式

正常模式或者正常遊戲（取自ノーマルゲームnōmarugēmu）玩嘅係闖關。同典型嘅炸彈人系列遊戲一樣，超級炸彈人 2 個正常模式係玩逐一攻略迷宮。同第一集唔同嘅係：

• 本作只可以供一個玩家控制住白色炸彈人獨自闖關，冇得好似第一集噉兩位玩家一齊闖，但係今集嗰啲關卡唔淨只局限於一個畫面噉大，而係畫面會隨玩家移動而跟住捲動，關卡嘅地圖可以大過第一集嘅好多。
• 第一集每個關卡只需要清晒啲敵人即可開門去下一關，但本作除咗清怪之外，仲要求玩家用炸彈破壞散落喺關卡周圍嘅膠囊（カプセルkapuseru ）先會開到出口。
• 本作打大佬會分兩段，第一段係面對好似炸彈人噉識用炸彈攻擊嘅大佬（凶惡炸彈五人眾），大佬唔夠打就會進入第二段，由大佬揸住巨型機甲攻擊白色炸彈人。

本作嘅故事好簡單，講凶惡炸彈五人眾（日文：凶悪ボンバー5人衆）坐住巨型太空船嚟侵略地球。身為英雄嘅白色炸彈人攻入五人眾嘅太空船，並且打低佢哋，保護地球。凶惡炸彈五人眾，按打嘅先後次序排，五人分別係磁力炸彈、巨像炸彈、可愛炸彈、頭腦炸彈同埋等離子炸彈。值得一提嘅係，本作係凶惡炸彈五人眾首次登場，佢哋其後亦有喺多隻炸彈人遊戲入便出現，多數係扮演奸角，例如係本作嘅續作噉。

本作並冇存檔嘅功能，假如玩家想去返之前去過嘅關卡，只能夠靠入密碼，噉樣做啲 power up 會全數 reset 。不過本作嘅闖關模式並唔長，有報告話一般嘅玩家玩兩至三個鐘已經可以打爆機。

對戰模式

本作對戰模式嘅截圖

睇埋：最後一個企喺度嘅人

超級炸彈人 2 嘅對戰模式（取自バトルゲームbatorugēmu）同一般炸彈人遊戲嘅大同小異，重點都係在於以炸彈攻擊對手、最後生還者嗰個謂之贏。玩家一邊用炸彈炸開戰場上嘅軟牆，一邊收集道具嚟強化自己，目的係用炸彈打低其他炸彈人。超級炸彈人 2 嘅對戰模式最多支援四位玩家對戰，當中部份玩家可以係由人工智能控制。

同第一集一樣嘅係，本作嘅對戰模式都有好多個場地可以揀，每個場地均有自己嘅 gimmick，譬如有一關有傳送門俾炸彈人喺戰場上唔同地點之間瞬間轉移，又有一關地面係冰，會跣腳。

超級炸彈人 2 支援單人戰同埋雙打兩種對戰模式。雙打即係二對二，四位玩家分白同黑兩隊對戰，每隊兩個人，1P 同 2P 兩個白色炸彈人對 3P 同 4P 兩個黑色炸彈人。

同第一集有別嘅係，喺單人戰之中，玩家可以撳 select 嚟改變自己個炸彈人嘅顏色，唔似得第一集噉固定咗係 1P 用白色炸彈人、2P 用黑色炸彈人、3P 用藍色炸彈人、4P 用紅色炸彈人。喺本作之中，玩家仲可以用綠色、黃色、紫色同粉紅等好多隻色嘅炸彈人。而每個炸彈人嘅炸彈同爆風，顏色上會同嗰個炸彈人一樣，例如白色炸彈人放嘅炸彈及其爆炸嗰時產生嘅爆風，都係白色嘅。

睇埋

• 炸彈人系列
• 超級炸彈人
• 超級炸彈人3

連出去

• 炸彈人維基超級炸彈人2
• 超級炸彈人2影片