超級馬利奧樂園

超級馬利奧樂園（日文：スーパーマリオランド；英文：Super Mario Land）係任天堂1989年4月21號喺Game Boy出嘅超級馬利奧樂園系列作品，佢係同Game Boy一齊出嘅遊戲之一^[1]。

簡介

遊戲嘅目的係打低宇宙怪物Tatanga，並救番Daisy公主。超級孖寶兄弟系列入面嘅Luigi、Peach公主同埋Bowser（日本叫Koopa）都無喺呢隻遊戲出現。

遊戲玩法同超級孖寶兄弟系列差唔多，都係控制馬利奧。佢嘅基本攻擊重係跳上去敵人上面踩死佢哋（但都有啲係踩唔死），攞到100個銀仔就可以獎一隻。

馬利奧攞到蘑菇會變大成「超級馬利奧」；攞到花會變成「Super Ball Mario（スーパーボールマリオ）」，可以掟Superball（スーパーボール）而唔係火球，而Superball可以用嚟殺敵同埋攞錢；攞到星星可以令自己變成無敵一段時間；攞到心就可以獎一隻。

成隻遊戲有12關，每個王國3關。其中世界2-3（第6關）係揸潛水艇，世界4-3（最後一關）係揸戰鬥機，呢兩關都係拉版嘅。

有一日，宇宙怪物Tatanga（タタンガ）諗住奪取Sarasaland（サラサ・ランド），就將嗰道啲住民催眠，兼且綁架咗黛西公主（デイジー姫）。馬利奧決定去救Daisy公主，並去過晒Sarasaland嘅四個王國，又遇到假扮黛西公主嘅怪物。最後佢摧毀咗Tatanga嘅戰鬥飛船，救番黛西公主。