趕鬼入豬群

出自維基百科,自由嘅百科全書
跳去導覽 跳去搵嘢
Healing of the demon-possessed.jpg

趕鬼入豬群係《聖經》記載耶穌嘅神蹟之一,喺《馬太福音》、《馬可福音》同《路加福音》都有記載。

聖經譯文[編輯]

耶穌嚟到湖對岸嘅加大拉人地區,有兩個俾鬼迷嘅人喺墳墓向住佢過嚟。佢哋非常兇猛,甚至冇人敢行呢條路。佢哋見到耶穌即刻話:「上帝嘅仔,你點解干擾我哋?時候重未到,你就嚟呢度叫我哋受苦咩?」附近有一大班豬喺度食緊嘢。鬼就求耶穌話:「若果要將我哋趕出去,就打發我哋進入班豬度啦!」耶穌對佢哋話:「去啦!」鬼就出嚟,入咗班豬度。一轉眼,成班豬都衝咗落山坡,跌落海度,浸死晒。放豬嘅就走返入城,將所有事情同俾鬼迷嘅人所遇到嘅都向眾人報告。全城嘅人都出嚟迎見耶穌,見到佢之後,就求佢離開佢哋嘅地區。

——《馬太福音》8章28-34節

佢哋嚟到加利利湖嘅對岸,到咗格拉森人嘅地區。耶穌一落船,就有一個俾污靈上身嘅人喺墳墓對住佢過嚟。嗰個人一向住喺墳墓裏面,冇有人能夠綁住佢,就連用鐵鏈都鎖佢唔住;因為好多次有人用腳鐐同鐵鏈鎖住佢,鐵鏈都俾佢整斷,腳鐐亦都俾佢整爛,總係冇人能夠制伏佢。佢經常喺墳墓度同山度大叫,又用石頭打自己。佢遠遠見到耶穌,立刻過嚟,跪喺耶穌面前,大聲叫:「至高上帝嘅仔耶穌,你點解要干擾我?我指住上帝求你,唔好叫我受苦!」因為耶穌曾經吩咐佢話:「污靈呀,喺呢個人身上出嚟!」耶穌問佢:「你叫咩名?」佢話:「我個名叫做『群』,因為我哋數目眾多。」佢就再三求耶穌唔好叫佢哋離開嗰個地方。喺山坡嗰度,有一大班豬喺度食緊嘢;污靈就求耶穌,話:「求你打發我哋進入班豬度,等我哋喺豬裏面。」耶穌批准佢哋,污靈就出嚟,入咗班豬度,嗰班豬就衝咗落山坡,跌落海度,浸死晒。豬嘅數目大約有二千隻。放豬嘅人將呢個消息報話畀城裏面同鄉下嘅人。眾人就出嚟,睇吓發生咗啲咩事。佢哋嚟到耶穌嗰度,睇見之前俾污靈上身嘅人,坐喺度,着好衫,神智清醒,佢哋就好驚。睇見呢啲事情經過嘅人將被鬼迷嘅人所遇見嘅,同嗰班豬嘅事,都話畀所有人知,全城嘅人就求耶穌離開佢哋嘅地區。耶穌上船嘅時候,嗰個曾經俾鬼迷嘅人懇求要同耶穌喺一齊。

——《馬可福音》5章1-17節

耶穌上咗岸,就有一個城裏面俾鬼迷嘅人對住佢過嚟。呢個人好耐冇着衫,唔住喺屋度,而住喺墳墓度。佢見到耶穌,就大叫起嚟跪喺耶穌面前,大聲話:「至高上帝嘅仔耶穌,你點解要干擾我?我求你,唔好叫我受苦!」因為耶穌曾經吩咐污靈喺呢個人身上出嚟。原來污靈多次捉住佢;當佢俾鐵鏈同腳鐐鎖住,佢都竟然將鎖鏈整斷,俾鬼趕到曠野度。耶穌問佢:「你叫咩名?」佢答話:「群」;因為有好多鬼迷住佢。鬼就求耶穌唔好命令佢哋去無底坑嗰度。嗰度有一大班豬喺山坡上面食緊嘢,鬼求耶穌批准佢哋進入班豬度;耶穌批准佢哋。於是鬼就喺嗰個人身上出嚟,入咗班豬度,嗰班豬就衝咗落山坡,跌落海度,浸死晒。放豬嘅人將呢個消息報話畀城裏面同鄉下嘅人。眾人就出嚟,睇吓發生咗啲咩事;到咗耶穌嗰度,發現嗰個人坐喺耶穌腳前,鬼已經離開咗佢,着好衫,神智清醒,佢哋就好驚。睇見呢啲事嘅人將俾鬼迷嘅人點樣得到醫治嘅事話畀佢哋聽。格拉森周圍地區嘅人,因為好驚,都求耶穌離開佢哋;耶穌就上船返去。

——《路加福音》8章27-37節

概覽[編輯]

耶穌同門徒嚟到格拉森嘅地方,嗰度係加利利對面。耶穌上咗岸,就有城裏面一個俾鬼迷住嘅人,迎面而嚟。呢個人好耐冇着衫,唔住喺房,只係住喺墳墓度。呢個人多次俾鬼捉住,嗰度嘅人用鐵鍊同腳鐐捆鎖住佢,並且派人看守住佢,但係佢都竟然將鎖鍊整斷。

耶穌命令污鬼離開嗰個人,污鬼於是求耶穌,唔好令佢哋受折磨。喺耶穌問對方嘅問題之中,顯示呢個人身上有好多污鬼。當佢哋知道耶穌唔准佢哋留喺嗰個人身上嘅時候,就懇求耶穌准佢哋去附喺附近嗰班豬度。耶穌批准佢哋,而當污鬼進入班豬度嘅時候,班豬衝落山坡跌落海,全部浸死晒。

消息好快噉傳開,當地有好多人即刻出嚟睇發生咩事,結果發現嗰個顛狂嘅人,竟然着好衫,神智清醒,恢復常態。當佢哋知道係耶穌釋放咗呢個俾群鬼迷住嘅人,佢哋對耶穌嘅能力都覺得好驚,於是都要求耶穌離開佢哋,俾鬼迷嘅人要求同耶穌喺一齊,但係耶穌要佢返去自己家鄉度,見證上帝嘅大能[1]

參考[編輯]