趙從衍家族

趙從衍家族係香港嘅商人家族，祖籍江蘇無錫。趙從衍本身係執業律師，1940年代尾開始投身航運業，之後成立華光船務，同包玉剛、董浩雲、曹文錦等人尊稱為香港船王之一。

家族史

趙從衍本身喺東吳大學畢業，係執業律師，1945年，佢見到航運業大有作為，於是買咗隻二手貨輪「國星號」，開始投身航運業，佢喺1948年落到嚟香港，成立咗華光船務，生意越做越有。1970年代，趙從衍將華光船務上市，同時更加涉足地產，成立咗華光地產。

不過到咗1980年代，全球航運業出現咗週期性嘅衰退，趙從衍冇好似包玉剛噉早著先機，削減航運業務，結果華光航運負債累累，趙從衍要將屋企嘅古董拍賣同埋華光地產嘅控股權賣走嚟填氹，與此同時趙從衍亦都喺呢個時候中咗風，最後到1992年先正式還晒。

1997年，趙從衍辭任華光航運主席，由趙世彭同趙世光做主席同副主席，但老婆倪亞震同三仔趙世曾入稟，要求法庭證實趙從衍精神狀況紊亂，唔可以控制到自己嘅財產，重要成立委員會處理佢嘅身家，官司打咗年幾，最後庭外和解收場，到1999年，趙從衍就死咗，但係訃聞度冇登到趙世曾一支人嘅名，雙方關係形同決裂。

趙從衍死咗冇耐，到老婆倪亞震身體轉差，趙世曾同阿妹趙世亮為咗點樣照顧個老母而罵戰，2000年倪亞震病逝，趙世曾同其他兄弟喺靈堂度都冇乜交流。同一年，小股東比利時航運公司CMB突然增持華光股權去到五成，重想私有化華光，趙世光為保家業，索性用四億將華光航運私有化。之後喺2001年，趙世彭因為心臟病發死咗，公司交晒畀世光打骰，後來佢喺2004年中風，同一年趙式明同趙式慶入咗公司，開始打理家族生意，之後趙式明喺2013年接任公司董事長。

感情生活方面，世彭、世曾、世光三兄弟生性風流，三個人都有唔少女朋友或者二奶，尤其以趙世曾最為高調，三個仔女都係同唔同嘅女朋友生嘅，佢都係風頭躉，成日喺娛樂新聞度出現；至於世彭，前女友戎克英試過走去華光嘅總部度企圖自殺，又喺老豆喪禮度爆出原來出面有私生子；世光亦有好多「紅顏知己」，例如：亞姐譚玉梅、程秀麗、秘書劉園園等。

另外佢哋嘅女友或者老婆好多都係影視明星，好似趙世光老婆何莉莉、前女友譚玉梅、趙世曾前女友姚煒、蔡珍妮（盈盈），甚至早死嘅趙世儀，佢老婆張燕都係拍戲出身。

上市公司

由趙世曾一支控制：

• 卓能集團（港交所：131）

另外趙世光一支控制住華光航運，華光喺2008年試過再上市，但後來因為市況唔好而取消。

家族聯姻

同邱德根家族有一段姻親關係：

• 邱華瑋=趙式明

家族成員

• 趙從衍（死咗）= 倪亞震（死咗）
  • 趙世彭（死咗）= 鄧素玲
    • 趙式南（死咗）
    • 趙式中
    • 趙式亞
    • 趙式英
    • 趙式華
    • 趙式智（喺趙從衍葬禮出現，自稱係趙世彭嘅私生仔）
  • 趙世儀（死咗）= 張燕
    • 趙適恒
    • 趙式安
    • 趙式言
  • 趙世曾（1936—）
    • 趙式芝（同姚煒所生）=楊如芯（離咗婚）
    • 趙式浩（同蔡珍妮所生）=廖康如
      • 趙子勤（同女友Winnie所生）
      • Adrian（廖康如所生）
      • Rian（廖康如所生）
    • 趙式正（同Terri Holladay所生）
  • 趙世光（死咗）=何莉莉
    • 趙式明=邱華瑋（何莉莉所生）
      • 邱耀德
      • 2015出世嘅仔
    • 趙式和=李承康（何莉莉所生）
    • 趙式平=Frederic（何莉莉所生）
      • 趙子蘭
    • 趙式慶=鄭慧師（何莉莉所生）
      • 趙子彤
      • 趙子昂
    • 趙式康（程秀麗所生）
    • 趙式珠（程秀麗所生）
  • 趙世亮=胡生
    • 兩個仔兩個女

拎

• 華光航運官方網頁
• 卓能集團官方網頁