跳水

出自維基百科,自由嘅百科全書
跳水

跳水喺廣義上,指某人由上而下跳落水道;通常要啲水有咁上下深,全身浸澌落去先至算。

以前興用嘅同義詞「插水」,家陣通常用於比喻,實際所指往往同水冇關。插水炮專解數種鬥快游水比賽開始時,選手由跳台飛躍入水嘅動作。亦有人會花式跳水,喺起跳至入水期間,做出各種困難又優雅嘅動作——見於娛樂表演及體育競技;下節所述者,屬於此類。

狹義[編輯]

香港維多利亞公園游泳池裏面有跳水嘅彈板同埋高台

跳水(英文:diving)係一種體育活動,職業比賽設有男、女跳板同跳台,雙人同步跳水,混合雙人同步跳水,隊際跳水。跳板跳水分別喺1米或3米跳板上進行。喺奧運、世界錦標賽、世界盃比賽,分別喺3米跳板同10米跳台進行。喺跳水比賽,女子要做出5個動作、男子要做出6個動作。

評判[編輯]

評判有5人或7人制,雙人同步跳水就有9人或11人。奧運、世界錦標賽同世界盃賽個人項目必須有7位評判評分,而雙人同步跳水就有11位評判評分。每一個動作嘅滿分為10分,評分準則係以每半分為單位遞增。

評分[編輯]

評判會根據運動員嘅助跑、行板、跑台、起跳、空中、入水動作嚟評定分數。

喺個人項目,如果係用7位評判,評分係將最高兩個同最低兩個分刪除,攞個所餘者嘅平均值,再乘難度分;如果係用5位評判,評分係將最高一個同最低一個分刪除,攞個所餘者嘅平均值,再乘難度分,總分最高嘅就贏。

極好 10分
好好 8.5-9.5分
比較好 7-8分
普通 5-6.5分
唔好 2.5-4.5分
唔合格 0.5-2分
失敗 0分

泳裝[編輯]

男運動員要着三角泳褲比賽,女運動員要着連體泳衣比賽。

動作組別[編輯]

根據運動員起跳嘅企位同起跳後身體方向,分為六組:

  1. 面向池,向前跳
  2. 面向板/台,向後跳
  3. 面向池,反身跳
  4. 面向板/台,向內跳
  5. 轉體
  6. 臂立(只喺跳台用)

動作姿勢[編輯]

  • 直體(用「A」表示)
  • 屈體(用「B」表示)
  • 抱膝(用「C」表示)
  • 翻騰兼轉體嘅任意姿勢(用「D」表示)

動作冧巴[編輯]

所有動作都用3或4個數字加1個英文字母表示。喺向前、向後、反身同向內組動作,第二個動作冧巴係代表飛身動作,當冇飛身動作嗰陣第二個動作冧巴就係 0。

第三個動作冧巴代表翻騰周數(以半周計算),例如: 1 = 半周、3 = 一周半。

喺臂立動作嘅第二個動作冧巴代表動作組別或方向: 1 = 向前;2 = 向後;3 反身。

例如:6124D即係臂立向前翻騰1周同轉體2周。

參考[編輯]