農民起事

農民起義（英文：Peasant Revolts），又叫做農民起事、農民戰爭，係一種農民因為受唔住統治者既管治，通常係壓迫（唔公平程度既增加）、重稅（賦稅既增加）、勞役（徭役多咗）、暴政（官員既橫徵暴斂）等影響佢哋生計既嘢，而作出既反抗行為，典型既例子就係1524年既德國農民戰爭（英文：German Peasants' War／Great Peasants' Revolt；德文：Deutscher Bauernkrieg），主要係因為上層架構既膨脹，令到農民既賦稅同埋徭役既增加。喺公元前209年（秦二世元年）既大澤鄉起義，前因係秦始皇既暴政令到民怨四起，而秦二世登基之後無解決到問題，就好似賈誼既《新書》卷一〈過秦中〉所講「繁刑嚴誅，吏治刻深，賞罰不當，賦斂無度，天下多事，吏弗能記，百姓困窮而主弗收恤」，陳勝、吳廣等人被迫起義。 農民起義既起因亦可以係瘟疫或者饑荒，以政府又無力處理，所以有必要推翻無能既政權，打破舊有既秩序同埋建制。典型既例子係公元1627年（明朝天啟七年）開始既一連串明末農民戰爭（又叫做晚明民變或者明末民變）。 當然，亦可能係暴政加上天災一齊嚟，例如公元1351年（元順帝至正十一年）爆發既紅巾軍起義，係因為稅賦沉重遇上連年天災。