遊牧民族

遊牧民族

出土馬具

藝術品

遊牧民族、牧民，講歐亞草原唔同族羣，有遊居文化，會養牛羊馬等。現今散佈多國，哈薩克、吉爾吉斯、塔吉克、土庫曼、烏茲別克、蒙古、中國、俄羅斯、烏克蘭、匈牙利咁。而青銅、車轆、騎馬等技術，擴散自草原到歐亞各地。古時同唔同文明貿易。西方會着重斯泰基人、塞種等，東方會着重匈奴、月氏、突厥等，而蒙古東西都有衝突，就兩面都重視。

遊牧民族會立國，有時成為大國。古時同南面農耕文化文明衝突，因而得有種種記錄。佢本身無乜紀錄留低，因而顯得神祕。要瞭解必定要靠考古，佢哋有定居地，有所謂王庭，墓葬反映有先進技術，配合佢哋生活同統治方式，尤其冶金、騎馬戰術，令佢哋可以侵畧擴張，變到非常強大。佢哋並唔係單一種族，大國就有好多種族，兼混唔同文化。戰敗可以遷徙到其他地方，走唔到就歸入敵方。

過去甚至現在，一般睇法話佢居無定所，話佢逐水草而居，呢個並非全貌。農耕文化對定居要求唔同，因而有誤會。農耕文化要近水灌溉平地，唔會遠離。而牧民實情都有定居地，不過要求唔同，尤其冬季嚴寒，有成兩到六個月要過冬。牧民會揀靠近高雪山南面，山陽地，有高山擋風，有雪水飲用，有日光暖身。由於冰河時期冰原冚實，就算山地都磨成丘陵，所以就算有山，都相對叫平坦，好啱牧畜。定居地冬夏都可以養牧。冬季遠離山陽地，草原枯黃兼凍到死，牧民實在難以生存。夏季草原茂盛，而定居地又唔夠草用，老弱婦孺留喺定居地，年青力壯會去草原過活。形成一般逐水草而居印象。定居崇山下，亦為佢哋帶來敬天信仰。

墓葬古時出土器物，以五金玉石為主。因為會移動，有陶器但唔多。