醫好天生盲眼嘅人

醫好天生盲眼嘅人係《聖經》記載耶穌嘅神蹟之一，記載喺《約翰福音》9章1-12節。

聖經譯文

「	耶穌喺路上見到一個天生盲眼嘅人。門徒問耶穌：「拉比，呢個人天生就盲眼，係邊個犯咗罪？係佢自己定係佢嘅父母呢？」耶穌回答：「既唔係呢個人犯咗罪，亦唔係佢嘅父母，而係要喺佢身上彰顯出上帝嘅能力。趁住白日，我哋必須做差我嚟嘅嗰位嘅工；黑夜一到，就冇人能夠做工。我喺世上嘅時候，係世上嘅光。」耶穌講完呢啲話，就吐口水喺地上，用調和口水嘅泥抹喺盲人嘅眼度，對佢話：「你去西羅亞池洗。」（西羅亞嘅意思就係「奉差遣」。）於是佢去，洗咗，返嚟就睇得見。佢嘅鄰舍同經常見到佢乞食嘅人，就話：「呢個唔係一向坐喺度乞食嘅人咩？」有啲話：「係佢」；又有啲話：「唔係，不過好似佢。」佢自己話：「係我。」於是佢哋對佢話：「你嘅眼係點樣開嘅呢？」佢答話：「有一個叫做耶穌嘅，用調和嘅泥抹我嘅眼，對我話：『去到西羅亞池洗。』我去一洗，就睇得見喇。」佢哋對佢話：「嗰個人喺邊？」佢話：「我唔知道。」	」
——《約翰福音》9章1-12節

概覽

呢章以耶穌係世界嘅光為主題，敘述一個天生盲眼嘅人重見光明嘅神蹟。叫盲人睇得見係耶穌所行嘅神蹟之中最多嘅一種。根據舊約，呢啲係上帝權能嘅彰顯，亦係彌賽亞嘅工作之一。門徒提出嘅問題係猶太人經常爭論嘅：「拉比，呢個人天生就盲眼，係邊個犯咗罪？係佢自己定係佢嘅父母呢？」對天生殘疾嘅奧秘，當時有三派意見：第一派係，法利賽人認為部分預定同部分由人引起；第二派係，撒都該人認為一切由人引起；第三派係，愛辛尼派認為全部係預定嘅。耶穌提出第四個解釋：「既唔係呢個人犯咗罪，亦唔係佢嘅父母，而係要喺佢身上彰顯出上帝嘅能力。」耶穌用口水同泥混合抹喺盲人嘅眼蓋上，只係畀佢一個外證，並唔係秘方。西羅亞池係猶大王希西家挖溝引基訓河水入耶路撒冷城嘅一個池，象徵上帝嘅供應同看顧，「西羅亞池」意思係差遣者嘅池，盲人去洗眼就睇得見，象徵人睇得見嗰位差遣者嘅嚟到，亦突顯出耶穌係「世界之光」。