醫好患癲癇病嘅男仔

出自維基百科,自由嘅百科全書

醫好患癲癇病嘅男仔係《聖經》記載耶穌嘅神蹟之一,喺《馬太福音》、《馬可福音》同《路加福音》都有記載。

聖經譯文[編輯]

耶穌同門徒到咗群眾當中,有一個人嚟見耶穌,跪低話:「主呀,求你可憐憫我個仔!佢患癲癇病好辛苦,多次跌落火度,又多次跌落水度。我帶佢去你門徒嗰度,但係佢哋都醫唔好佢。」耶穌話:「噯!呢個冇信心又腐敗嘅世代呀,我喺你哋呢度要到幾時呀?我容忍你哋要到幾時呀?將佢帶到嚟我呢度啦!」耶穌責備個鬼,鬼就出嚟;呢個男仔就即刻好返。

——《馬太福音》17章14-18節

群眾當中有一個人話:「老師,我帶咗我個仔嚟見你,佢俾啞巴鬼附住。無論喺邊度,鬼襲擊佢,佢就跌倒,佢又嘔白泡,咬牙切齒,身體枯乾。我請過你嘅門徒將鬼趕出去,但係佢哋都無能力為力。」耶穌話:「噯!呢個冇信心嘅世代呀,我喺你哋呢度要到幾時呀?我容忍你哋要到幾時呀?將佢帶嚟我呢度啦!」佢哋就帶咗佢嚟。佢一見到耶穌,鬼就令到佢重重噉抽瘋,跌喺地上打滾,嘔白泡。耶穌問佢阿爸:「佢患咗呢個病幾耐呀?」佢答話:「自細就有喇。鬼多次將佢扔喺火度、水度,想要殺佢。你若果能夠,求你可憐憫我哋,幫助我哋。」耶穌對佢話:「你若果能夠有信心,凡事都有可能。」男仔嘅阿爸立即大叫話:「我信!但係我嘅信心唔夠,求主幫助。」耶穌睇見群眾都上緊嚟,就責備污鬼,話:「你呢個聾啞嘅鬼,我吩咐你喺佢身上出嚟,唔進再入去!」嗰鬼大叫,令到個男仔猛烈抽筋,就出咗嚟。男仔好似死咗噉,令到好多群眾都話:「佢死咗喇。」但係耶穌拉住佢隻手,扶佢起身,佢就企咗起身。耶穌入咗屋,門徒就靜靜噉問佢:「點解我哋趕唔到隻鬼出嚟㗎?」耶穌話:「若果唔係用禱告,就唔能夠將鬼趕出嚟。」

——《馬可福音》9章17-29節

第二日,佢哋落咗山,就有好多人迎接耶穌。其中有一個人大叫話:「老師!求你救我個仔,因為佢係我唯一嘅仔。佢俾鬼捉住就突然大叫;鬼又令到佢抽筋,嘔白泡,並且重重噉傷害佢,唔肯罷休。我求過你嘅門徒將鬼趕出去,但係佢哋都做唔到。」耶穌話:「呢個冇信心又腐敗嘅世代呀,我喺你哋呢度要到幾時呀?我容忍你哋要到幾時呀?將你個仔帶嚟我呢度啦!」男仔嚟嘅時候,鬼令到佢跌倒,又令到佢猛烈抽筋。耶穌就責備嗰個污鬼,將個男仔醫好,交畀佢阿爸。群眾都詫異上帝嘅大能 。

——《路加福音》9章37-42節

欖覽[編輯]

耶穌曾經賜畀門徒有趕鬼權柄,而且成功,點解今次會唔成功?可能有以下五個原因:

  1. 敵對勢大:敵對嘅人多勢眾,連經學士亦都嚟咗。
  2. 冇人做主:耶穌同主要門徒都唔喺度。
  3. 病態嚴重:見到耶穌之後發作得更加厲害。
  4. 信心唔夠:男仔嘅阿爸語氣冇信心。
  5. 缺乏禱告:需要有禁食禱告生活,門徒先至會有能力。

「噯!呢個冇信心嘅世代呀!」係耶穌對門徒嘅感慨,因為後嚟耶穌直接斥責門徒信心唔夠。門徒嘅失敗係因為對自己嘅成功缺乏期望,而且自己都唔知,所以奇怪點解冇能力。相比之下,男仔嘅阿爸自知信心唔夠。耶穌確認信心嘅能力,若果能夠有信心,凡事都有可能[1]

參考[編輯]

  1. (PDF). 原著 (PDF)喺2020年3月16號歸檔. 喺2020年10月31號搵到.