醫好痲瘋病人

醫好痲瘋病人係《聖經》記載耶穌嘅神蹟之一，喺《馬太福音》、《馬可福音》同《路加福音》都有記載。

聖經譯文

「	耶穌落咗山，有一大班人跟住怇。呢個時候，有一個痲瘋病人嚟拜佢，話：「主啊，只要你肯，你能夠令到我潔淨。」耶穌伸手摸佢，話：「我肯，你潔淨咗喇！」佢嘅痲瘋病即刻就潔淨咗。耶穌對佢話：「你要留意，唔好將呢件事同任何人講，只要去俾祭司幫你檢查，並獻上摩西所吩咐嘅祭物，作為證據證實你已經潔淨。」	」
——《馬太福音》8章1-4節

「	有一個痲瘋病人嚟求耶穌，向佢跪低，話：「只要你肯，你能夠令到我潔淨。」耶穌憐憫佢，就伸手摸佢，話：「我肯，你潔淨咗喇！」痲瘋病即刻離開佢，佢就潔淨咗。耶穌鄭重噉吩囑佢，即刻打發佢走，對佢話：「你要留意，千祈唔好話畀任何人知，只要去俾祭司幫你檢查，又因為你已經潔淨，獻上摩西所吩咐嘅祭物，向人證明你已經潔淨。」但係呢個人一出去，反而好多嘢講，將呢件事傳咗開去，令到耶穌唔能夠再公開入城，只好留喺外邊曠野地方，群眾仍然從各地嚟搵佢。	」
——《馬可福音》1章40-44節

「	有一次，耶穌喺一個城裏面，有個全身長滿痲瘋嘅人，見到耶穌，就跪喺地求耶穌話：「主啊，只要你肯，你能夠令到我潔淨。」耶穌伸手摸佢，話：「我肯，你潔淨咗喇！」痲瘋病即刻離開咗佢。耶穌吩咐佢：「你唔好話畀任何人知，只要去見祭司，等佢幫你檢查，又因為你已經潔淨，要按照摩西所吩咐嘅獻上祭物，作為證據向人證明你已經潔淨。」但係耶穌嘅名聲越傳越開。有一大班人聚集嚟聽道，亦希望耶穌醫治佢哋病。但係耶穌卻退到曠野度祈禱。	」
——《路加福音》5章12-14節

概覽

耶穌時代嘅大痳瘋，包括好多皮膚病、性病、頑癬同現代人稱為嘅痳瘋病，都係無藥可醫嘅絕症，並且係傳染病。所以自古猶太人就將呢啲病人放喺冇人接近嘅地方，加以隔離。呢個痳瘋病人，竟然喺城度出現。佢對耶穌有非常大嘅信心話：「只要你肯，你能夠令到我潔淨。」「只要你肯」呢句，係呢個患痳瘋者祈求嘅先決條件。

「耶穌伸手摸佢，話……」耶穌一邊講，一邊行動，霎時間，耶穌嘅手重未完全掂到佢，佢嘅嘢重未講完，嗰個人嘅大痳瘋就潔淨咗。耶穌吩咐佢唔好話畀任何人知，只要按照律法嘅要求，將身體俾祭司檢查，並且獻祭，證實佢潔淨咗，令到佢嘅鄰里親朋重新接納佢。喺耶穌潔淨大痳瘋病人後，所有人對耶穌就有更深嘅認識同瞭解；指望耶穌醫治佢哋嘅病。但係耶穌卻退到曠野度祈禱，與上帝交通。