醫好癱瘓病人

醫好癱瘓病人係《聖經》記載耶穌嘅神蹟之一，喺《馬太福音》、《馬可福音》同《路加福音》都有記載。

聖經譯文

「	耶穌上咗船，過海，返到自己嘅城。有人用床抬住一個癱子到耶穌面前。耶穌見佢哋嘅信心，就對癱子話：「仔呀，放心啦，你嘅罪得赦喇。」呢個時候，有幾個文士心裏話：「呢個人講褻瀆嘅嘢。」耶穌知道佢哋嘅心意，就話：「你哋心裏面點解懷住惡念呢？講『你嘅罪得赦喇』，定係講『你起身行啦』，邊一樣容易呢？我要畀你哋知道，人子喺地上有赦罪嘅權柄」，於是對癱子話：「起身！拎起你張床返屋企啦。」嗰個人就起身，返屋企。睇見嘅人都驚慌，佢哋頌讚上帝，因為佢將噉樣嘅權柄賜畀人。	」
——《馬太福音》9章1-8節

「	過咗幾日，耶穌又返去迦百農。啲人聽到佢喺屋度，好多人就嚟聚集喺度，甚至連門前都冇空地；耶穌就對佢哋講道。有人帶住一個癱子嚟見耶穌，係由四個人抬嚟嘅；因為人多，冇辦法抬到耶穌面前，就將屋頂拆咗一個窿，跟住將癱子同佢瞓嘅床吊落去。耶穌見佢哋嘅信心，就對癱子話：「仔呀，你嘅罪得赦喇。」有幾個文士坐喺嗰度，心裏議論話：「呢個人點解噉樣講呢？佢講褻瀆嘅嘢。除咗上帝一位之外，邊個有赦罪嘅權呢？」耶穌立即知道佢哋心裏面噉樣議論，就話：「你哋心裏點解噉樣議論呢？對癱子講『你嘅罪得赦喇』，定係講『起身！拎你張床起身行』，邊一樣容易呢？我要畀你哋知道，人子喺地上有赦罪嘅權柄。」就對癱子話：「我吩咐你，起身！拎起你張床返屋企啦。」嗰個人就起身，即刻拎起張床，當住眾人面前出去，以致大家都好驚奇，歸榮耀畀上帝，話：「我哋從來冇見過噉樣嘅事！」	」
——《馬可福音》2章1-12節

「	有一日，耶穌教導人，有法利賽人同律法教師亦坐喺旁邊；佢哋喺從加利利各鄉村、猶太同耶路撒冷嚟嘅。主嘅能力與耶穌同在，令佢能夠治好病人。呢個時候，有幾個人用床抬住一個癱子，要將佢抬去耶穌面前，但係因為人太多，冇辦法將佢抬入去，就上咗房頂，拆開瓦片，連人帶床將佢吊落去，放喺耶穌面前。耶穌見佢哋嘅信心，就話：「朋友，你嘅罪得赦喇。」文士同法利賽人就開始議論話：「呢個人係邊個，竟然講褻瀆嘅嘢？除咗上帝一位之外，邊個能夠赦罪呢？」耶穌知道佢哋噉樣議論，就回答佢哋說：「你哋心裏面點解噉樣諗呢？講『你嘅罪得赦喇』，定係講『你起身行啦』，邊一樣容易呢？我要畀你哋知道，人子喺地上有赦罪嘅權柄。」耶穌就對癱子話：「我吩咐你，起身！拎起你張床返屋企啦。」嗰個人當住眾人面前即刻起身，拎起佢張床返屋企，歸榮耀畀上帝。眾人都驚奇，亦歸畀上帝，並且滿心懼怕，話：「我哋今日睇見唔尋常嘅事！」	」
——《路加福音》5章17-26節

概覽

有一日，就喺耶穌教導眾人嘅時候，從加利利各鄉村同猶太並耶路撒冷嚟嘅教法師同法利賽人；因為眾人睇見耶穌嘅教訓同醫病嘅大能，就將榮耀歸畀上帝，並且滿心懼怕。噉對教法師同法利賽人嚟講，耶穌已經成為佢哋一個日漸嚴重嘅問題。所以佢哋要聚集喺一齊，坐喺旁邊，仔細觀察佢，呢個係引人注意嘅情景。

佢哋嘅聚會突然被打斷咗，因為有幾個人抬住佢哋嘅癱子朋友。因為人群太擁擠，佢哋無辦法去到耶穌面前，就喺屋頂開咗一個窿，將患病嘅朋友吊落去，正好落到耶穌面前。耶穌並冇先醫治佢身體上嘅病，卻對癱子話：「你嘅罪得赦喇。」

耶穌講嘅嘢即刻引起教法師同法利賽人嘅批評。佢哋認為耶穌講咗褻瀆嘅嘢，因為除咗上帝以外，邊個能夠赦罪呢？耶穌就對佢哋話：「講『你嘅罪得赦喇』，定係講『你起身行啦』，邊一樣容易呢？」然後，冇等佢哋回答，就話：「我要畀你哋知道，人子喺地上有赦罪嘅權柄。」就對嗰癱子話：「起身！拎起你張床返屋企啦。」嗰個人立即起身，離開咗佢哋，並歸畀上帝。「眾人都驚奇」，「眾人」可以包括嗰啲教法師、法利賽人同一切在場嘅百姓。因為嗰日，佢哋睇見啲「唔尋常嘅事」，意思即係唔係人所能夠瞭解嘅事。