長洲戲院

出自維基百科,自由嘅百科全書
Jump to navigation Jump to search
長洲戲院

長洲戲院Cheung Chau Cinema)喺香港長洲新興後街120號,面積大概3萬幾平方呎。戲院服務長洲街坊超過六十年,直到1990年代初執笠,而家已經荒廢多年。喺2011年9月2號被評為香港三級歷史建築

[編輯]

長洲戲院喺1931年開業,由東主姚氏經營,嗰時係黑白電影默片嘅年代。戲院播放粵語片同西片,日頭放映一場,夜晚就放映兩場。當時長洲戲院裏面設有現場解話嘅旁白員,解釋電影片段嘅內容。戲院裏面有六百幾個座位,喺全盛時期經常全院滿座,連路口同通道亦都企滿戲迷,戲院外面就有大量小販賣燒魷魚、甘蔗、話梅,相當熱鬧。長洲戲院戲飛初頭係港幣毫子,喺1990年代就20蚊一張戲飛,執笠嗰時最貴嘅戲飛係25蚊。戲院營業咗超過半個世紀之後,終於喺1990年代初執笠。2001年,電影《一碌蔗》曾經喺長洲戲院取景。

建築同設備[編輯]

長洲戲院樓高兩層,用中式折衷建築風格,用石磚同大石砌成。建築物正面係戲院大門,入口上方有螺旋柱頭裝飾嘅簷篷,頂部刻住「長洲戲院」四個字,正門後面就係售票大堂,大堂裏面設有售票處同展示電影海報嘅位置。售票大堂後面就係放映大堂,裏面有六百幾個座位。大堂尾掛咗一塊戲院東主由外國買入、睇說明書後自己郁手安裝嘅白色銀幕。售票大堂嘅上面2樓係放映室。由於日久失修,而家屋頂中間因為風雨破壞穿咗個大窿。

出面網頁[編輯]