長老 (基督教)

長老係基督教嘅神職人員。喺《聖經》原文，「長老」同「監督」呢兩個詞係通用嘅。每個教派嘅長老制度並唔係完全相同嘅，不過都係按照《聖經》對長老嘅要求而定。有啲宗派認為，牧師亦係長老（但係長老唔一定係牧師），因此一啲人數較少嘅教會通常只有牧師，唔會另外有長老。每個教派裏面長老制度唔同嘅地方，係喺《聖經》裏面並冇明確指示嘅部分，例如：長老嘅提名、選舉或其他方式確認、任期同連任等。

一般嚟講，長老係由會眾選出嚟嘅普通信徒，係義務為教會工作，冇人工嘅；但係有啲教會，尤其是部份靈恩派教會，長老亦同牧師一樣有人工嘅。

喺初代教會中有監督同長老嘅職份，監督需要有好名聲、樂於教導、善於接待、自守、言行端正，保羅喺羅馬嘅時候曾經訓勉提摩太要好好管理教會，亦教導點樣喺教會裏面選定監督同長老。