關愛共享計劃

關愛共享計劃（英文：Caring and Sharing Scheme）係香港政府計劃喺2019年向符合相關條件嘅香港市民發放最多4,000港元嘅計劃。

背景

財政司司長陳茂波喺2018年2月28號發表2018-19年度《財政預算案》，畀坊間批評政府有巨額盈餘之下，「還富於民」嘅措施（俗稱「派糖」）只有好少人受惠，結果政府喺3月23號公佈推出「關愛共享計劃」，保證人人都有4,000港元嘅受惠。

申請人首先要喺2018年12月31號符合下面四個條件：
1. 夠18歲；
2. 揸香港身份證（包新來港人士，但唔包嚟香港工作、求學、接受培訓嘅香港非永久性居民同佢哋嘅受養人，亦唔包用訪客身分嚟香港嘅人）；
3. 通常居住喺香港（包暫時離開香港而喺合理預期情況下會返香港住嘅人，例如出差、留學、求醫，但唔包移居海外人士）；
4. 無攞2018-19年度《財政預算案》對綜合社會保障援助、長者生活津貼、高齡津貼或者傷殘津貼發放嘅額外兩個月款項。
除上面四個條件：
1. 如果唔使薪俸稅，喺香港無物業，可以攞全額4,000蚊津貼。
2. 如果唔使薪俸稅，喺香港有一個自住物業，而差餉寬減額少過4,000蚊，可以申請4,000蚊扣除差餉寬減嘅餘額。
3. 如果要交薪俸稅，喺香港無物業，而薪俸稅稅款寛減額少過4,000蚊，可以申請4,000蚊扣除薪俸稅稅款寛減嘅餘額。
4. 如果要交薪俸稅，喺香港有一個自住物業，而差餉寬減額加埋薪俸稅稅款寛減額少過4,000蚊，可以申請4,000蚊扣除薪俸稅稅款寛減加埋薪俸稅稅款寛減嘅餘額。

關愛共享計劃由在職家庭津貼辦事處負責，喺2018年12月31號公佈申請安排。計劃喺2019年2月1號到4月30號接受申請，可以喺1月21號開始攞表格。

除咗填好咗嘅表格，申請人要交埋下面嘅證明文件：

初頭要提交埋申請日期前3個月內嘅住址證明副本，但之後取消咗呢個規定。

遞交申請方式可以郵寄或者放落指定地點嘅投遞箱。