阿塞拜疆海軍

阿塞拜疆海軍（阿塞拜疆文：Azərbaycan Hərbi Dəniz Qüvvələri），係一支駐紮喺裏海嘅內陸海軍部隊。

史

阿塞拜疆海軍嘅成立可以追溯到1918年8月5號，因為嗰陣時俄羅斯帝國嘅艦隊部署響阿塞拜疆嘅領海，阿塞拜疆民主共和國政府決定咗成立呢支海軍。當時得6隻船。蘇聯統治阿塞拜疆之後，呢支艦隊被編入蘇聯海軍。響1991年蘇聯解體，蘇聯裏海艦隊就俾阿塞拜疆同俄羅斯聯邦瓜分。1992年6月，呢尐阿塞拜疆擁有嘅船掛咗國旗，正式投入使用。根據蓋達爾·阿利耶夫響1996年頒發嘅總統令，8月5日係阿塞拜疆海軍日。阿塞拜疆海軍被認為係繼俄羅斯聯邦之後實力第二強嘅裏海艦隊。

簡氏海軍年鑒嘅2001-2002版指出，阿塞拜疆海岸警備隊響2002年7月成立。艦隊最早嘅總司令係Rafig Asgarov，家陣艦隊由海軍中將Shahin Sultanov領導。

軍力

依家阿塞拜疆海軍大約有5000人服役，又有包括海岸警備隊嘅16個部門。

服役嘅船

家陣服役嘅船有：

• 1艘彼佳級護衛艦
• 7艘巡邏艇，包括：兩艘奧薩級導彈快艇同5艘斯丹卡級巡邏艇
• 7艘掃雷艦，包括：兩艘索尼婭級掃雷艇同5艘葉夫根級掃雷艇
• 6艘登陸艇同1艘特種軍艦

響2000年，阿塞拜疆向土耳其買咗一艘AB-25級巡邏艇。2001就向美國買咗2艘巡邏艇；另外響2001-2005年先後向土耳其買咗30艘巡邏艇。

海軍特種部隊

響2001年，阿塞拜疆喺土耳其海軍嘅援助之下成立咗海軍特種部隊，訓練同編製都同參與援助嘅土耳其海軍特種部隊同美國海軍特種部隊有相似之處。

2004年利特爾克里克兩棲基地嘅一個海豹部隊小組參加咗同阿塞拜疆第641海軍特種部隊嘅聯合作戰演習，司令部設於巴庫外嘅阿塞拜疆海軍基地。

同美國嘅合作

響2006年，美國送咗3艘摩托艇畀阿塞拜疆，重簽埋援助更新裏海艦隊嘅戰艦嘅協議。

響2007年阿塞拜疆海軍同美國嘅一座軍工廠達成協議，標誌住阿塞拜疆嘅部分船隻會裝備更加先進嘅激光瞄準設施，重會有美國專家對呢尐設施嘅使用者加以培訓。