包皮係響陰莖前端包著、保護龜頭嘅一塊皮。包皮內側皮脂腺嘅分泌物含有溶菌成分，能夠抵擋有害細菌，亦都有保護龜頭嘅功能，不過會變成叫做㞗屎嘅包皮垢，要定時清走，但如果洗得密得滯，都可能會感染外來細菌，導致發炎。如果男人嘅包皮過長，扯旗嗰陣包皮褪唔到落去，條㞗就叫包莖，會影響性交表現。有啲男人因為包莖又或者係清潔同宗教原因（猶太教或者回教徒），就要割包皮，即係做包皮環切術或者包皮背切術。但另一方面，古希臘覺得男人冇包皮包住龜頭好核突，甚至要用條繩勒住冠狀溝，防止包皮向後褪。
