愛丁堡公爵愛德華王子

愛德華王子
愛丁堡公爵
在位	2023年 -
前任	查理斯三世
韋息士伯爵
在位	1999年 -
前任	威廉菲茨柯斯本
私人明細
配偶	愛丁堡公爵夫人蘇菲
仔女	路易絲溫莎女勳爵; 塞文子爵占士
父	愛丁堡公爵菲臘親王
母	伊利沙伯二世
出世	1964年3月10號（60歲）; 英國白金漢宮

愛丁堡公爵愛德華王子（英文：Prince Edward, Duke of Edinburgh，1964年 3月10號—），全名愛德華·安東尼·理察·路易（英文：Edward Antony Richard Louis），係英國王室成員，伊利沙伯二世同愛丁堡公爵菲臘親王嘅第四個細路。

佢依家係王位繼承順序上排名第13，喺奧古斯丁·布魯士班克（二哥安德魯王子個外孫）之後，喺阿仔占士之前。

生平

1964年3月10號，愛德華王子響倫敦白金漢宮出世，係英女皇伊利沙伯二世同愛丁堡公爵菲臘親王嘅第四個小孩。早年入讀Collingham College，之後升讀響雅士谷嘅Heatherdown School，但係響A-Level考試入面英文攞C、歷史同政治攞D嘅成績，升唔到大學，所以佢響中學畢業後就去咗紐西蘭一年。1983年返英國加入海軍陸戰隊並且到劍橋大學耶穌學院攻讀歷史，由海軍陸戰隊資助佢嘅大學學費，雖然成績唔算太好但依然畀劍橋錄取，最終響1986年獲得文學學士二等二級榮譽學位。

1986年大學畢業後正式到海軍陸戰隊受訓。但響1987年愛德華宣佈退出海軍陸戰隊，理由係「佢唔想以軍人作為佢嘅長期職業」。由於早前佢曾經委託公司Really Useful Group製作音樂劇Cricket以慶祝英女王60大壽，加上佢對文學有興趣，於是到Really Useful Group做製作助理，主要製作音樂劇，例如《歌劇魅影》。

1993年，愛德華自費成立幕後製作公司Ardent Productions，參加咗好多紀錄片同戲劇嘅製作，但佢畀人話靠住皇室成員嘅身份嚟賺錢。雖然係噉，但呢間公司差唔多年年蝕錢咁滯。2001年，旗下員工響製作紀錄片嗰陣，涉嫌侵犯威廉王子嘅私隱，犯下大忌，最終愛德華響2002年宣佈辭去製作總監同埋總經理一職。

佢響1999年6月19號響聖佐治教堂同蘇菲結婚，同年獲封銜頭韋息士伯爵，係英國王室第一位被封為「伯爵」而唔係「公爵」嘅王子，原因係愛德華畀1998年電影《寫我深情》嘅角色「Lord Wessex」吸引，因此希望成為「Earl of Wessex」。佢哋有兩個細路，分別係路易絲溫莎女勳爵同塞文子爵占士。同年兩公婆成立韋息士伯爵青年信託基金會，主要為細路同年輕人提供機會同埋出路。

愛德華王子好重視年青人嘅發展，除咗成立韋息士伯爵青年信託基金會外，2006年佢仲成為愛丁堡公爵獎國際委員會主席，並多次前往世界各地訪問，就好似以色列、巴爾的摩、南非等地，鼓勵年輕人參加呢項計劃。2014年，佢被任命為蘇格蘭長老會高級專員。2022年，佢接替老豆愛丁堡公爵菲臘親王出任英國皇家溫莎馬展主席。

2019年獲封另外一個蘇格蘭銜頭科發伯爵。2023年3月10號獲封為愛丁堡公爵，而大仔占士則繼承佢原先所擁有嘅銜頭「韋息士伯爵」。

睇埋

出面網頁

呢篇貴族文係楔位文。歡迎幫維基百科擴寫佢。

呢篇同英國人相關係楔位文。歡迎幫維基百科擴寫佢。