香港假日
(由香港公眾假期跳轉過嚟)
提示：呢篇文講嘅唔係香港節日。香港假日係香港政府為勞工安排放假嘅日子，分做兩種：公眾假期同法定假日。
公眾假期
[編輯]公眾假期係由香港法例第149章《公眾假期條例》規定，而家每年有17日，加埋每個禮拜日，銀行、教育機構、公共機構辦事處同政府部門都會喺呢啲日子放假，好多公司嘅白領亦可以放公眾假期。
皆因日曆會用紅字標出，所以又叫「紅日」。
公眾假期一覽：
- 每個禮拜日
- 元旦（即係1月1號，若果嗰日係禮拜日，就喺之後嗰日補假）
- 年初一（若果嗰日係禮拜日，就喺年初四補假）
- 年初二（若果嗰日係禮拜日，就喺年初四補假）
- 年初三（若果嗰日係禮拜日，就喺年初四補假）
- 清明（若果嗰日係禮拜日，就喺之後嗰日補假）
- 耶穌受難節
- 耶穌受難節翌日
- 復活節翌日
- 勞動節（即係5月1號，若果嗰日係禮拜日，就喺之後嗰日補假）
- 佛誕（即係四月初八，若果嗰日係禮拜日，就喺之後嗰日補假）
- 端午節（若果嗰日係禮拜日，就喺之後嗰日補假）
- 香港回歸紀念日（即係7月1號，若果嗰日係禮拜日，就喺之後嗰日補假）
- 國慶（即係10月1號，若果嗰日係禮拜日，就喺之後嗰日補假）
- 中秋節翌日（若果嗰日係禮拜日，就喺中秋節後嘅第二日補假，或者行政長官會同行政會議喺憲報刊登嘅命令指定取代呢日嘅另一日）
- 重陽節（若果嗰日係禮拜日，就喺之後嗰日補假，或者行政長官會同行政會議喺憲報刊登嘅命令指定取代呢日嘅另一日）
- 聖誕節（即係12月25號，若果嗰日係禮拜日，就喺聖誕節後第二個日補假）
- 聖誕節翌日
法定假日
[編輯]法定假日又叫勞工假期，假期比公眾假期少，係由香港法例第57章《僱傭條例》規定，2022年之前每年有12日。呢個係香港勞工嘅最基本假期福利，通常藍領嘅工廠、地盤工人同服務性行業都係放法定假日。但係服務性行業喺假期嗰日通常都係最忙嘅，所以服務業員工多數都唔可以喺正日放假，要喺法定假日嘅前後60日補假。
2022年開始至2030年，香港每年嘅法定假日，將會每兩年增加一日，逐步增加至17日。2022年新增嘅法定假日為佛誕，未來新增嘅法定假日依次序為2024年開始嘅「聖誕節翌日」、2026年開始嘅「復活節翌日」、2028年開始嘅「受難日」，以及2030年「受難節翌日」。
法定假日一覽：
- 元旦（即係1月1號）
- 年初一
- 年初二
- 年初三
- 清明
- 勞動節（即係5月1號）
- 佛誕（2022年新增）
- 端午節
- 香港回歸紀念日（即係7月1號）
- 國慶（即係10月1號）
- 中秋節翌日
- 重陽節
- 聖誕節或者冬至（由僱主決定放邊日）
- 聖誕節翌日（2024年新增）