馬票

馬票（票粵語讀做標）係香港賽馬會以前賣嘅一種彩票，結合賽馬同攪珠，1931年首賣；分大馬票同小搖彩兩種，每次攪珠開出入圍號碼，再以一場馬嘅賽果決定結果。大馬票原先每年開兩次，後增加到3至4次，包括秋季、春季同夏季大馬票。秋季大馬票以廣東讓賽做開獎賽事，而夏季大馬票則以香港打吡大賽嘅結果開獎。大馬票頭獎彩金由早期嘅數十萬港元，至後期超過100萬港元。

小搖彩就響馬季期間每月開獎一次，彩金由早期約一萬蚊，到後期大約接近十萬蚊。第二次世界大戰中斷後，1947年重開。到1976年7月，馬會開始舉辦六合彩，而大馬票就響1977年起取消。1999年，馬會為慶祝千禧年而重新舉辦慈善大馬票，共分20款，每張售20港元，以2000年1月1號凌晨舉行嘅千禧盃作為開獎賽事。2009年11月15號，為慶祝香港賽馬會成立125周年，復辦「125周年紀念馬票」，頭獎係約值1,250萬元嘅足金^[1]。