鬼三二一

鬼三二一gwai2 saam1 ji6 jat1，又叫鬥大dau3 daai6，係嶺南地區流行嘅一種啤牌玩法。規則同鋤大弟類似，主要唔同係有鬼牌，而且除咗鬼牌之外剩低嘅牌係3最大而唔係2。遊戲開始之前洗牌，之後將牌平均派畀各玩家。最先打嗮手上嘅牌為贏家。

基本大細規則

彩色嘅大鬼最大，之後到細鬼，之後3 > 弟 > 煙 > 傾 > 囡 > 積 > 10 > ...... > 5 > 4，花色方面同鋤大弟一樣，葵扇 > 紅心 > 梅花 > 階磚。兩張牌先比字嘅大細，如果字一樣先至比花色。除咗鬼之外，最大係葵扇3，最細係階磚4。

出牌次序

玩家一般圍成圈，按順時針或者逆時針次序出牌。第一輪通常係攞階磚4嘅玩家出先，有啲規則要求嗰個玩家一定要先出階磚4或者含有階磚4嘅啤牌組合。如果之前已經打過一局，亦有可能係上一局贏咗嗰個出先。第一個玩家可以決定出單張牌，或者兩到五張牌嘅啤牌組合，之後下一個玩家可以選擇叫「大」跳過自己嗰輪，亦可以跟住出牌。如果跟住出，張數應該同上一個玩家出嘅一樣，而且大細方面要壓過佢。噉樣一路落去直到一個玩家出嘅牌無人壓得過為止，之後佢就可以開始新一輪，決定自己出乜牌，一路落去直到有人打嗮手上嘅牌為止。

啤牌組合

• 五張：同花順>四條>葫蘆>花>蛇
• 三張：三條
• 兩張：啤

兩隻鬼牌可以組成一對，但係除此之外鬼牌唔可以砌成其它啤牌組合。同類啤牌組合嘅大細順序（比如兩個花之間嘅順序）可以有唔同規定，通常喺開始玩之前協商好。

變化

通常鬥大要至少三個人玩，但係亦有適合兩個人玩嘅變化玩法。

開始之前，啲牌先唔派嗮，而係每人派指定張數（通常係五張或者十張），每一輪壓到對方無牌出嘅玩家可以由剩低嘅牌堆道摸牌，將手牌補充到指定張數，之後另一個玩家跟住摸牌將手牌補充到指定張數。喺全部牌摸完嘅前提下，最先打完手上牌嘅係贏家。其它規則唔變。

註

• 點指兵兵，入面提到「鬼三二一」嘅玩法。