魔法少女

擁躉扮演魔法少女

魔法少女係日本漫畫、卡通、小說同電子遊戲一種女仔角色，通常有變身同法術道具，如神仙棒、寶石盒之類，伴隨寵物仔形角色指導，以變身同法術解決問題，或者對抗邪惡，打走妖怪。唔少亦以愛情故事穿插。香港等唐人地方，早年亦冠以仙女嘅說法。

魔法少女雛型，可追至一九五三年漫畫藍寶石王子，化身男子又得，女子又得。接住一九六二年漫畫小魔鏡，以魔鏡仔為法術道具，可以化身為乜都得。而卡通呢，就係一九六六年，魔法使莎利，香港當時譯名小仙女，卡通取材自一九六四年美國電視片集歡喜冤家。

到咗1970年代，有卡通就生出咗魔女子嘅講法，由一九七二年仙女青萍，以及一九七四年仙女下凡帶動。一九八〇年，小仙女麗寶，日文名為魔法少女ララベル，係日本首部以魔法少女稱呼卡通。八十年代，又有兩部小學生變身長大成人嘅形態，分別為皮樂一九八二年甜甜仙女，同一九八三年嘅我係小忌廉。甜甜仙女開始咗寵物仔角色伴隨。我係小忌廉亦為完整魔法少女典型，而且甚為成功，原本對象為女仔，發覺亦好多男人睇。此後皮樂創造一系列魔法少女卡通，魔法少女題材大為流行。一九九一年美少女戰士，一九九六年百變小櫻，二〇〇四年光之美少女，二〇一一年魔法少女小圓，代表住各年代魔法少女演變。魔法少女小圓有諷刺魔法少女嘅意味。

魔法少女興起，同日本女子解放，社會上女子影響力大升，以及男女平等有關。女人進入各行各業，亦生出新嘅題材。另外，亦有多方面營銷策畧有關，推廣歌手，玩具產品等。我係小忌廉亦為歌手太田貴子出道之作，真實出道歌手扮演卡通中出道歌手。之後玩具公司萬代，亦以美少女戰士卡通視為產品宣傳。

文

魔法少女，名字出自日文，音以平假名寫成まほうしょうじょ，羅馬字寫成mahō shōjo。英文稱之為Magical girl。