鶴園角北帝廟

位於紅磡馬頭圍道與北拱街交界的鶴園角北帝廟

鶴園角北帝廟係香港九龍紅磡嘅一間北帝廟，係喺九龍紅磡馬頭圍道146號，而家被評為香港三級歷史建築。由於鶴園角北帝廟嘅位置喺紅磡，所以成日被叫做「紅磡北帝廟」，鶴園角北帝廟而家由華人廟宇委員會打理。

歷史

鶴園角北帝廟喺1876年起嘅，原址係喺今日馬頭圍道同青州街交界嘅小山丘上面。1921年，呢間北帝廟因政府開闢道路而拆咗。真武大帝（北帝）神像就暫放咗喺譚公道。1929年卑利船廠嘅一名管工提議起過一間新廟，再續香火，於是街坊一眾夾錢，喺紅磡馬頭圍道嘅現址重起新廟。

雖然喺原址嘅北帝廟已經喺1921年拆咗，但而家原址附近仍有一條命名為北帝街嘅街道。鶴園角北帝廟喺紅磡馬頭圍道同北拱街嘅交界處，而北拱街嘅個名具有「受北帝拱衞嘅地方」嘅意思。廟前供奉嘅土地壇，本來喺機利士路，聽講超過一百年歷史，1960年因發展而搬咗去紅磡嗰度。鶴園角北帝廟曾經喺2005年進行過大型嘅維修工程。