鷄公欖

喺上下九街頭入面嘅鷄公欖雕像

鷄公欖係廣州嘅一種曾經好流行嘅特產小食，係用上等嘅白欖經過一系列複雜嘅工序醃製而成嘅，包括有甜嘅和順欖、鹹嘅甘草欖同埋辣嘅辣椒欖。

歷史

鷄公欖爾個名源自一種銷售方式：賣鷄公欖嘅人將一隻色彩搶眼嘅紙紮大鷄公套喺身上邊，一邊吹嘀噠一邊沿街叫賣，而嘀噠吹出來嘅旋律通常係「sol-sol-mi-sol」，同鷄公嘅叫聲相當似。後來鷄公欖重演變出一種飛機欖：由於啲西關小姐平時甚少出街，買嘢都係由樓上個窗道擲啲錢落街，因此賣欖人需要好精準恁將粒欖擲入擲錢落街嗰位小姐個窗裡邊，少啲工夫都唔得。

鷄公欖喺二十世紀二三十年代嘅廣州西關好流行。隨著時代變遷，賣鷄公欖嘅人越來越少，少到近乎絕跡。進入廿一世紀之後，為徂保存同活化傳統文化，荔灣區嘅荔枝灣文化交流協會專門贊助徂幾位失業人員，請佢等喺上下九步行街駝著（塑料紮嘅）大鷄公賣鷄公欖。